İnfrastruktur

Ana səhifə

İnfrastruktur

Azərbaycan Təhsil Nazirliyi elektron xidmətlərin tətbiqinə başlayıb

02 mart 2012 07:45 (UTC +04:00)

Bakı. Nicat Mustafayev - APA-Economics. Azərbaycan Təhsil Nazirliyində elektron xidmətlərin tətbiqinə başlanıb.

İKT İnformasiya Mərkəzindən «APA-Economics»ə verilən məlumata görə, Təhsil Nazirliyində elektron hökumət xidmətləri interaktiv və informasiya istiqamətləri üzrə formalaşmaqdadır. Elektron xidmətlər bölməsi Təhsil Nazirliyinin www.edu.gov.az rəsmi internet səhifəsində fəaliyyət göstərir.

İnteraktiv xidmətlərə «Ümumi təhsil müəssisələrinə qəbulla bağlı elektron ərizə», «Tam və ümumi orta təhsil pilləsi üzrə sınaq və yekun buraxılış imtahanların nəticələri haqda məlumatların əldə edilməsi», «Ümumi təhsil müəssisələrinə müəllimlərin işə qəbulu üçün ərizələrin qəbulu, imtahanların keçirilməsi və imtahan nəticələri haqda məlumatların əldə edilməsi», «2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı üzrə elektron ərizələrin qəbulu», «Şagirdlərin təhsildə qazandıqları cari nailiyyətləri əks etdirən məlumatların əldə edilməsi» (Valideyn Nəzarət Sistemi) kimi bloklar daxildir.

Ümumi təhsil müəssisələrinə müəllimlərin işə qəbulu ilə bağlı bölmədə vakant yerlərə müəllimlərin işə qəbulu üzrə reqlament, müəllimlərin işə qəbulu üzrə elektron ərizə, şəxsi kabinet, namizədlər tərəfindən vakant yerlərin seçilməsi və elektron ərizənin doldurulmasına dair təlimat, test suallarının cavablandırılmasına dair təlimat və s. funksionallar və məlumatlar yerləşdirilib.

«Ümumi təhsil müəssisələrinə qəbulla bağlı elektron ərizə» bölməsində ərizələr «e-məktəb»lərdə 2012-ci ilin avqustundan qəbul edilməyə başlayacaq. Sonra isə Azərbaycan Təhsil Şəbəkəsinə qoşulmuş digər məktəblərin şagirdləri və valideynlər «Ümumi təhsil müəssisələrində sınaq və yekun buraxılış imtahanlarının nəticələri» bölməsi vasitəsilə imtahanların nəticələri ilə tanış ola biləcək.

«Respublikada fəaliyyət göstərən bütün növ təhsil müəssisələri haqqında məlumatların əldə edilməsi» istiqaməti üzrə fləş texnologiyaları əsasında interkativ «Məktəb xəritəsi» proqramı (www.schoolmap.edu.az) qurulub. Həmçinin məktəb haqqında lazım olan ətraflı məlumatları özündə birləşdirən (www.ned. edu.az) Milli Təhsil Məlumat Bazası yaradılıb. Məlumat bazasında məktəbdənkənar, ilk peşə-ixtisas, orta ixtisas və ali təhsil müəssisələrinin siyahısı, əlaqə nömrələri , ünvanları, sayt və elektron poçt ünvanları göstərilib.

Təhsil Nazirliyinin internet səhifəsindən, həmçinin elektron xidmətlər vasitəsilə ölkədə fəaliyyət göstərən bütün növ təhsil müəssisələrinə qəbul qaydaları, ümumtəhsil məktəblərində şagird nailiyyətlərinin məktəbdaxili, milli və beynəlxalq qiymətləndirilməsi, təhsil müəssisələrində təhsil alanların təhsil müəssisələrini dəyişmək qaydaları, de-institutlaşma və uşaqların müdafiəsi barədə məlumatların əldə edilməsi, Təhsil Nazirliyinin rəhbər işçiləri ilə əlaqəsi, xarici dövlətlərin ali təhsil sahəsində ixtisaslarının tanınması və ekvivalentliyinin müəyyən edilməsi qaydaları və etik standartlar modeli haqqında məlumatları almaq olar.