İnfrastruktur

Ana səhifə

İnfrastruktur

Azərbaycanda Kür çayı üzərindəki avtomobil körpüsü əsaslı təmirdən sonra istifadəyə verilib - FOTOSESSİYA

Azərbaycanda Kür çayı üzərindəki avtomobil körpüsü əsaslı təmirdən sonra istifadəyə verilib - <font color=red>FOTOSESSİYA</font>

07 mart 2012 08:42 (UTC +04:00)

Şirvan. Əlibəy Zeynallı - APA. Azərbaycanda Kür çayı üzərindən keçən, Hacıqabul-Bəhrəmtəpə avtomobil yolunun 8-ci km-liyində yerləşən avtomobil körpüsündə əsaslı təmir başa çatıb. APA-nın Mil-Muğan bürosunun məlumatına görə, bu gün saat 11:30 radələrində körpü avtomobillərin istifadəsinə verilib.

Körpüdə təmir işlərini Türkiyənin «Kolin İnşaat» şirkəti həyata keçirib. «Azəryolservis» ASC-nin sifarişi ilə həyata keçirilən əsaslı təmir işləri 2 ay davam edib. Tikinti işlərinə verilən müddətin vaxtı 45 gün olsa da, şirkət təmiri 16 gün gec tamamlayıb. Buna havaların qarlı və şaxtalı keçməsi səbəb olub.

Körpünün açılması Sabirabad, Saatlı və İmişli rayonlarının Şirvan şəhəri ilə avtomobil əlaqəsini bərpa edib. Bundan əvvəl körpüdə yalnız piyadaların hərəkəti mümkün idi. Avtomobillər isə bu istiqamətdə Sabirabad, Saatlı rayonlarına Hacıqabul rayonu ərazisindən keçməklə Bakı-Qazax yolundan, Salyan rayonu ərazisindən və Salyan-Noxudlu yolundan istifadə edirdilər.

Qeyd edək ki, Nəqliyyat Nazirliyinin məlumatına görə, 1962-ci ildə istifadəyə verilən körpünün müxtəlif hissələrində tez-tez yırtıqlar əmələ gəldiyindən, körpü davamlı olaraq qısamüddətli təmirə dayandırılırdı. Bu səbəbdən bu istiqamətdə hərəkət edən sürücü və sərnişinlərin həyatı üçün ciddi təhlükə yaranırdı. Bunu nəzərə alaraq Nəqliyyat Nazirliyi həmin istiqamətdə avtomobillərin hərəkətinin bu ilin 6 yanvar tarixindən tamamilə dayandırılmasına və əsaslı təmirin aparılmasına qərar vermişdi.

Əsaslı təmir zamanı körpünün dəmir konstruksiyasından başqa bütün dəmir beton örtüyü təmamilə sökülərək yeniləri ilə əvəzlənib, 14 ədəd dəmir-beton körpü tiri və 310 dəmir beton tava dəyişdirilib. Dəmir beton tavalar dəyişdirildikdən sonra 309 metr uzunluqda və 7 metr enində, ümumilikdə isə 2 min kvadrat metrdən çox olan sahəyə beton tökülüb və asfalt salınıb. Körpü boyu dəmir borulardan suaxar dəliklər quraşdırılıb.

Mütəxəssislər qeyd edir ki, körpünün 2 ay bağlı qalması Şirvan şəhərinin iqtisadiyyatına və sahibkarlara külli miqdarda maddi ziyan vurub.