İnfrastruktur

Ana səhifə

İnfrastruktur

«Azerfon» şirkətinin «Vodafone»la tərəfdaşlığı «Nar Mobile» brendini də əhatə edəcək

14 mart 2012 12:57 (UTC +04:00)

Bakı. Nicat Mustafayev - APA-Economics. Bu gündən etibarən Azərbaycanın mobil rabitə operatoru olan «Azerfon» şirkətinin «Vodafone» şirkəti ilə apardığı tərəfdaşlıq «Nar Mobile» brendini də əhatə edəcək.

«Azerfon»dan «APA-Economics»ə verilən məlumata görə, «Nar Mobile»ın müştəriləri bu tərəfdaşlıqdan faydalanmaq imkanı əldə edəcək. Belə ki, milli bazarda tanınan «Nar Mobile» brendi dünya miqyaslı «Vodafone» brendi ilə bir araya gələrək, «Nar Mobile» ilə «Vodafone» məhsul və xidmətlərini bazarda birgə reallaşdıracaq. «Azerfon» şirkəti «Vodafone»nun dünya miqyasında özünü doğrultmuş münasib təcrübəsindən istifadə edərək, bu tərəfdaşlıqdan artıq əhəmiyyətli dərəcədə bəhrələnə bilib.

Şirkətdən həmçinin bildirilib ki, «Azerfon»la «Vodafone» arasında 2009-cu ildə imzalanmış tərəfdaşlıq haqqında saziş Azərbaycanda mobil rabitənin inkişafında yeni mərhələyə çevrilib: «Həmin tərəfdaşlıq sayəsində «Nar Mobile»ın müştəriləri 120-dən artıq ölkədə səsli və məlumat rouminq xidmətlərindən istifadə etmək imkanını əldə edəcək. Telefon nömrələri 070 və 077 prefiksləri ilə başlayan bütün müştərilər eyni xidmət və tariflərdən istifadə edəcək, eyni şəbəkə vasitəsilə xidmətlərdən yararlanacaqlar».

«Nar Mobile» abunəçiləri 3G xidmətlərindən, o cümlədən video zəng, yüksək sürətlə məlumatların ötürülməsi, təkmil səs keyfiyyəti və 2012-ci ildə geniş şəbəkə əhatəsi və imkanlara malik olacaq. Saniyədə 384 kb sürətlə məlumatları ötürən 3G texnologiyasından fərqli olaraq, «Nar Mobile» şəbəkəsi müştərilərə saniyədə 14,4 Mb qədər yüksək sürətli ötürülmədən faydalanmaq imkanını yaradacaq.

Qeyd edək ki, 2011-ci ildə «Nar Mobile» şəbəkənin geniş şəkildə genişləndirilməsi və müasirləşdirilməsinə 80 mln. ABŞ dollardan artıq sərmayə yatırıb və bunun nəticəsində Azərbaycanın bütün şəhər və rayonları 3G şəbəkəsi ilə əhatə olunacaq. «Nar Mobile» abunəçiləri, həmçinin bu yaxınlarda mobil rabitə xidmətlərindən, o cümlədən «Azərbaycan Hava Yolları» şirkətinin uçuşları zamanı səsli zəng, SMS və internet tam şəkildə istifadə edə biləcək.