İnfrastruktur

Ana səhifə

İnfrastruktur

Bakıda Ümumdünya Metrologiya gününə həsr olunmuş tədbir keçirilib

18 may 2012 09:58 (UTC +04:00)

Bakı. Elnur Hüseynquluyev - APA-Economics. Bu gün Standartlaşdırma, Metrologiya və Patent üzrə Dövlət Komitəsi (SMPDK) tərəfindən 20 may - Ümumdünya Metrologiya günü münasibətilə tədbir keçirilib.

«APA-Economics»in məlumatına görə, tədbirdə bildirilib ki, bu günün tarixi 1875-ci ilin may ayının 20-də Parisdə Beynəlxalq Diplomatik Konfransda inkişaf etmiş 17ölkənin hökumət nümayəndələrinin məşhur Metrik Konvensiyasını imzalaması ilə başlayıb. Konvensiyaya uyğun olaraq Beynəlxalq Kəmiyyət Ölçüləri və Çəkiləri Bürosu yaradılıb, ölçmələr üzrə elm sahəsində beynəlxalq əməkdaşlığın əsasları və onun sənayedə, ticarətdə praktiki tətbiqi mexanizmləri işlənib hazırlanıb. Metrik Konvensiyası bütün ölkələrdə elmi-texniki tərəqqiyə təsir edib. Belə ki, bu sənəddən sonra ölçmələrin metrik sistemi və beynəlxalq vahidlər sistemi tətbiq edilib və onun əsasında Beynəlxalq Ölçmələr Sistemi yaradılıb.

Tədbirdə SMPDK-nın Dövlət Metrologiya Xidmətinin rəisi Oqtay Abbasov bildirib ki, müəyyən edilmiş metroloji norma və qaydalara riayət edilməsi Azərbaycanın diqqətində olan ən vacib məsələlərdəndir. Çünki yalnız ölçmələrin düzgün nəticələri məhsulun keyfiyyətinə və təhlükəsizliyinə, tibbi diaqnostikanın səmərəliliyinə təminat verir.

O.Abbasovun sözlərinə görə, Azərbaycanda keyfiyyət infrastrukturunun beynəlxalq tələblər səviyyəsində qurulması və inkişafı istiqamətində də müvafiq addımlar atılıb. Belə ki, bu ilin aprel ayında komitə yanında Texniki Tənzimləmə və Standartlaşdırma üzrə Dövlət Nəzarəti Xidməti, Dövlət Akkreditasiya Xidməti və Dövlət Metrologiya Xidməti yaradılıb: «Metrologiya sahənin inkişafı istiqamətində Dövlət Metrologiya Xidmətinin rolu böyükdür. Xidmət dövlət kəmiyyət vahidləri etalonlarının əldə olunması, qorunub saxlanılması, dövlət etalonlarından kəmiyyət vahidlərinin ötürülməsi və bu sahədə dövlət siyasətinin həyata keçirilməsini təmin edən icra hakimiyyəti orqanıdır».

O.Abbasov qeyd edib ki, Dövlət Metrologiya Xidmətinin etalon bazasında səciyyəvi xüsusiyyətləri ilə fərqlənən «Vaxt» və «Tezlik» etalon kompleksi aratıq işlək hala gətirilib. Hazırda isə kəmiyyət vahidlərinin dövlət etalonları laboratoriyalarının beynəlxalq metroloji təşkilatlar tərəfindən tanınması istiqamətində işlər aparılır.

Tədbirdə həmçinin radioloji kəmiyyətlərin ölçülməsi sahəsində etalonların alınması ilə bağlı müzakirələr aparıldığı bildirilib. Qeyd olunub ki, kəskin ehtiyac duyulan geniş bir sahə olmaqla yanaşı, əhalinin şüalanmaya nə dərəcədə məruz qaldığı, istər iş şəraiti, istərsə də ərzaq, ekoloji, tibbi xidmət təhlükəsizliyinin təminatı baxımından bu laboratoriyaların qurulması ölkə üçün faydalı olacaq.