İnfrastruktur

Ana səhifə

İnfrastruktur

Gəncədə “Mənzil fondunun idarə olunmasının yeni metodlarının tətbiqi” mövzusunda tədbir keçirilib

18 may 2012 11:52 (UTC +04:00)

Bakı - APA-Economics. Bu gün Gəncədə İqtisadi İnkişaf Nazirliyinin (İİN) təşkilatçılığı ilə “Mənzil fondunun idarə olunmasının yeni metodlarının tətbiqi” mövzusunda tədbir keçirilib.

Nazirlikdən “APA-Economics”ə verilən məlumata görə, tədbirdə İİN-in nümayəndələri, Gəncə-Qazax iqtisadi rayonuna daxil olan rayon icra hakimiyyəti başçılarının müavinləri, bələdiyyə sədrləri iştirak edib.

Tədbiri giriş sözü ilə açan Gəncə Şəhər İcra Hakimiyyəti başçısının müavini Rafiq Şəfiyev Gəncə şəhərində mənzil kommunal təsərrüfatı və infrastrukturun inkişafı istiqamətində həyata keçirilən layihələr, kommunal xidmətlərin keyfiyyətinin mövcud normaların tələblərinə uyğunlaşdırılması istiqamətində görülən işlər barədə məlumat verib, belə bir tədbirin Gəncədə təşkilini müsbət qiymətləndirib.

İqtisadi inkişaf nazirinin müavini Sevinc Həsənova Azərbaycan prezidenti İlham Əliyev tərəfindən uğurla davam etdirilən sosial-iqtisadi inkişaf strategiyası nəticəsində regionların simasının günü-gündən dəyişdiyini, sosial infrastruktur təminatının həcminin və keyfiyyətinin yüksəldiyini vurğulayıb. Qeyd edilib ki, son illər bu sahədə bir sıra qanunvericilik aktları qəbul edilib ki, bunlardan da biri 1 oktyabr 2009-cu il tarixindən qüvvədə olan yeni Mənzil Məcəlləsidir. Məcəllə vətəndaşların mənzil hüququnun maneəsiz həyata keçirilməsinə şərait yaradılması, sosial infrastrukturun inkişaf etdirilməsi, kommunal xidmətlər sisteminin təkmilləşdirilməsi və əhalinin kommunal xidmətlərlə təminatının yaxşılaşdırılması sahəsində köklü islahatların aparılmasında böyük əhəmiyyət kəsb edir. Bu istiqamətdə islahatların davam etdirilməsi məqsədilə Azərbaycan prezidentinin 15 fevral 2011-ci il tarixli fərmanı ilə mənzil-kommunal təsərrüfatı sahəsində dövlət siyasətinin, inkişaf konsepsiyasının, dövlət proqramlarının və normativ hüquqi aktların layihələrinin hazırlanması İİN-ə tapşırılıb. Mənzil-kommunal sahəsinin yeni qanunvericiliyin tələblərinə uyğun olaraq idarə olunmasına keçidlə əlaqədar aparılacaq islahatların əlaqələndirilməsi, əhalinin səmərəli sosial müdafiə mexanizminin yaradılması istiqamətində İİN tərəfindən tədbirlər görülür, dövlət proqramlarının və normativ hüquqi aktların layihələrinin hazırlanması istiqamətində ardıcıl işlər aparılır. Qeyd edilib ki, bu sahədə əsas yeniliklərdən biri də bazar iqtisadiyyatı prinsiplərinə uyğun olaraq mənzil fondunun idarə olunmasının yeni metodlarının tətbiqidir.

Nazir müavini Sevinc Həsənova qarşıya qoyulmuş məqsədlərə nail olunmasının səmərəli mexanizminin yaradılması məqsədilə icra və bələdiyyə qurumları ilə birlikdə genişmiqyaslı maarifləndirmə və təbliğat işlərinin aparılması, ictimaiyyətin Mənzil Məcəlləsinin yenilikləri və üstünlükləri, habelə digər vacib məqamlar barədə məlumatlandırılmasının vacibliyini qeyd edib.

Tədbirdə İİN-in Mənzil-kommunal siyasəti şöbəsinin müdiri Nizami Qasımov, şöbənin sektor müdiri Mikayıl Zeynalov mənzil-kommunal təsərrüfatının inkişaf perspektivləri, yeni idarəetmə formalarının tətbiqinin əhəmiyyəti və üstünlükləri barədə çıxış edib, tədbir iştirakçılarının sualları cavablandırıblar.

Tədbirin sonunda iştirakçılara “Mənzil fondunun yeni idarəetmə üsullarına dair sənədlər toplusu”na dair broşurlar paylanıb.