Azərbaycan Nəqliyyat, Rabitə və Yüksək Texnologiyalar Nazirliyi və Azərbaycanda Amerika Ticarət Palatası ("AmCham Azerbaijan") birgə onlayn video-konfrans keçirib.
Nazirlikdən "APA-Economics"ə verilən məlumata görə, görüşün təşkili "AmCham Azerbaijan"ın fərdi məlumatların işlənməsi və mühafizəsi ilə bağlı qanunvericiliyin təkmilləşdirilməsi ilə əlaqədar təkliflərindən irəli gəlib.
Video-tədbirdə nazirin müavini Elmir Vəlizadə, Azərbaycanda Amerika Ticarət Palatasının İdarə Heyətinin üzvü Rüfət Hacıəlibəyli, "AmCham Azerbaijan"ın fərdi məlumatlar üzrə İşçi qrupunun üzvləri, o cümlədən beynəlxalq və yerli təşkilatların nümayəndələri iştirak ediblər.
Görüşdə çıxış edən E. Vəlizadə Avropa qanunvericiliyində fərdi məlumatlar sahəsində edilmiş dəyişikliklərin digər ölkələrə də təsirini nəzərə alaraq, Azərbaycanda hazırlanmış yeni qanun layihəsi barədə məlumat verib.
"Qanun layihəsi Nəqliyyat, Rabitə və Yüksək Texnologiyalar Nazirliyində aidiyyəti dövlət qurumlarının nümayəndələrindən ibarət işçi qrupu tərəfindən hazırlanıb. Bu məqsədlə İşçi qrupu tərəfindən fərdi məlumatlar sahəsində beynəlxalq təcrübə araşdırılıb və yeni "Fərdi məlumatlar haqqında" qanun layihəsi işlənib. Yeni qanun layihəsində Avropa təcrübəsindən və beynəlxalq təcrübədən irəli gələn məqamların milli qanunvericiliyə tətbiqi mexanizmləri nəzərə alınıb", - deyə E. Vəlizadə qeyd edib.
Hazırlanan layihə barədə təqdimat Nazirliyin əməkdaşı Vüqar Həsənov tərəfindən iştirakçılara təqdim edilib. Qanun layihəsində nəzərdə tutulan yeniliklər, o cümlədən yeni anlayışlar və maddələr barədə ətraflı məlumat verilib. "AmCham"ın verdiyi təkliflərin layihədə öz əksini tapması göstərilib.
Müzakirələr zamanı görüşdə iştirak edən təşkilatların üzvlərinin fərdi məlumatlar sahəsində lisenziyalaşdırma, sertifikatlaşdırma, fərdi məlumatların transsərhəd ötürülməsi, subyektlər tərəfindən onların fərdi məlumatlarının işlənməsinə verdikləri razılıq, məsuliyyət növləri və s. barədə sualları cavablandırılıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
