Maliyyə

Ana səhifə

Maliyyə

Azərbaycan parlamenti maliyyə sahəsinə aid üç qanun layihəsinin müzakirəsinə başlayıb

10 iyun 2009 15:02 (UTC +04:00)

Bakı. Vahab Rzayev, Elbrus Seyfullayev – APA-Economics. Bu gün Azərbaycan Milli Məclisi iqtisadi siyasət komitəsinin iclasında Vergi Məcəlləsinə, həmçinin «Milli Bank haqqında» və «Büdcə sistemi haqqında» qanunlara əlavə və dəyişikliklərin edilməsi ilə bağlı qanun layihələri müzakirə olunub.

«APA-Economics»in məlumatına görə, «Milli Bank haqqında» qanuna əlavə və dəyişikləri Azərbaycan Mərkəzi Bankı İdarə Heyətinin sədri Elman Rüstəmov təqdim edib. Qanunun adı və mətnində «Milli» sözünün «Mərkəzi» sözü ilə əvəzlənməsi ilə yanaşı müəyyən maddələrə təkmilləşmə əhəmiyyəti daşıyan və Mərkəzi Bankın anti-böhran tədbirlərinin həyata keçirilməsinə imkan yaradan dəyişikliklər və əlavələr təklif olunur. Məsələn, əlavə edilən 49.1 maddəyə əsasən, Mərkəzi Bank sosial-iqtisadi əhəmiyyətli layihələrin maliyyələşdirilməsi, habelə iqtisadiyyatın real sektoruna maliyyə dəstəyinin təmin edilməsi məqsədi ilə dövlət zəmanəti əsasında banklara məqsədli kreditlər verə bilər.

Vergi Məcəlləsinə əlavə və dəyişiklərə qanun layihəsini vergilər nazirinin birinci müavini Natiq Əmirov təqdim edib. Redaktə məqsədi daşıyan dəyişikliklərlə yanaşı bir sıra əlavələrin edilməsi təklif olunur. Belə ki, qanun layihəsinə əsasən, vergi ödəyicisi tərəfindən malların (iş və xidmətlərin) dəyəri ödənilən gündən gec ƏDV məbləğinin ödənilməsinə görə vergi ödəyicisinə vaxtında ödənilməmiş ƏDV məbləğinin 50%-i miqdarında maliyyə sanksiyası tətbiq edilir. Bundan başqa, Məcəlləyə hüquqi şəxs yaratmadan sahibkarlıq fəaliyyəti həyata keçirən fiziki şəxslərin vergiyə cəlb edilən gəlirlərindən 20% dərəcəsi ilə vergi tutulması barədə maddənin əlavə edilməsi təklif olunur.

«Büdcə sistemi haqqında» əlavə və dəyişikliklərin edilməsi barədə qanun layihəsini maliyyə naziri Samir Şərifov təqdim edib. Qanun layihəsində bir sıra redaktə xarakterli dəyişikliklər və əhəmiyyətli əlavələr əks olunub. Məsələn, dövlət büdcəsində təsdiqlənmiş ayırmalar həmin məqsədlər üçün xərclərin ən yüksək həddini göstərir və il ərzində faktiki xərclərin məbləği həmin həddən çox ola bilməz. Digər əlavəyə əsasən, dövlət büdcəsinin icrası prosesində gəlirlər və kəsirin maliyyələşdirilməsi üzrə nəzərdə tutulmuş vəsaitlər təsdiq edilmiş məbləğdən az daxil olduqda, funksional və iqtisadi təsnifat üzrə xərclər (müdafiə xərcləri maddələri istisna olmaqla) mütənasib şəkildə, inzibati təsnifat üzrə xərclər isə müvafiq icra hakimiyyəti orqanının müəyyən etdiyi qaydada azaldıla bilər.

Müzakirələr nəticəsində hər üç sənəd iqtisadi baxımdan, qanunvericiliyin təkmilləşdirilməsi, dünya maliyyə böhranının nəticələri ilə mübarizənin aparılması baxımından əhəmiyyətli hesab olunaraq, parlamentin plenar iclasında müzakirəyə çıxarılmaq üçün tövsiyə olunub.