Maliyyə

Ana səhifə

Maliyyə

Azərbaycanda sığortalanmış əmanətlər üzrə illik faiz dərəcəsinin yuxarı həddi 15% səviyyəsində müəyyənləşdirilib

10 iyun 2009 15:56 (UTC +04:00)

Bakı. Vahab Rzayev – APA-Economics. Bu gün Azərbaycan Əmanətlərin Sığortalanması Fondu (ƏSF) Himayəçilik Şurasının növbədənkənar iclası keçirilib. Fonddan «APA-Economics»ə verilən məlumata əsasən, Şuranın qərarı ilə qorunan əmanətlər üzrə illik faiz dərəcəsinin yuxarı həddi Azərbaycan Mərkəzi Bankı ilə razılaşdırılmaqla 15% müəyyən edilib.

Qeyd edək ki, «Əmanətlərin sığortalanması haqqında» qanuna edilmiş dəyişikliklə qorunan əmanətlər üzrə illik faiz dərəcəsinin yuxarı həddinin müəyyən edilməsinin Azərbaycan Mərkəzi Bankının uçot faiz dərəcəsindən asılılığı aradan qaldırılıb. Qəbul olunmuş qanuna əsasən, illik faiz dərəcəsinin yuxarı həddini Azərbaycan Mərkəzi Bankı ilə razılaşdırmaqla ƏSF-nın Himayəçilik Şurası müəyyən edir.

Cari ilin yanvarından etibarən Fonda üzv olan banklarda 15% dərəcəsi ilə və bu faiz dərəcəsi həddində əmanətlər yerləşdirmiş əmanətçilərin əmanətləri qorunan əmanətlər hesab olunur və Fond tərəfindən sığortalanır. Xatırladaq ki, qanuna edilmiş dəyişikliyə əsasən kompensasiya məbləğinin maksimum həddi 30 min manatdır. Əmanətçilər əmanətlərin sığortalanması üçün heç bir ödəniş etmirlər. Sığorta haqları yalnız banklar tərəfindən ödənilir.

Qeyd edək ki, ƏSF-ya üzv olan banklarda fiziki şəxslərin əmanətləri 2009-cu ilin yanvar-mart aylarında 1 746,862 mln. manat, o cümlədən qorunan əmanətləri 1 097,698 mln. manat , qorunmayan əmanətçilərin əmanətləri isə 126,484 mln. manat olub. Bu müddət ərzində fiziki şəxslərin qorunmayan əmanətləri 522,680 mln. manat təşkil edib. Beləliklə, bu ilin birinci rübündə fiziki şəxslərin ümumi əmanətlərinin 63%-i qorunan əmanətlərin, 37%-i isə qorunmayan əmanətlərin payına düşüb. Ötən ilin IV rübü ilə müqayisədə fiziki şəxslərin ümumi əmanətləri 35,605 mln. manat (2%) artıb, qorunan əmanətlər üzrə isə 275,771 mln. manat (20%) azalma müşahidə olunub.

Xatırladaq ki, ƏSF 2007-ci il avqustun 13-dən fəaliyyətə başlayıb. Banklar tərəfindən quruma ödənilən birdəfəlik üzvlük haqqı isə 10 min manat təşkil edir.