Maliyyə

Ana səhifə

Maliyyə

Azərbaycandakı bankların kapitalın yetərliliyi əmsalı üzrə renkinqi

11 iyun 2009 14:24 (UTC +04:00)

Bakı. Elnur Hüseynquluyev – APA-Economics. Azərbaycanda fəaliyyət göstərən bank kredit təşkilatlarının 2009-cu ilin aprel ayının 1-nə müxtəlif maliyyə göstəriciləri üzrə renkinqlərinin hazırlanması layihəsi çərçivəsində «APA-Economics» bu dəfə bankların kapitalın yetərliliyi əmsalı üzrə sıralamasını təqdim edir.

Bu əmsalın ən sadə hesablanması mexanizmi bankların məcmu kapitalının aktivlərin həcminə nisbətinin çıxarılması prinsipinə əsaslanır. Banklar fəaliyyətin minimal kapital əsasında qurulmasının tərəfdarı olsa da, bank sektorunda tənzimləyici funksiyalarını yerinə yetirən dövlət qurumları əksinə, kapitalın həcminin mütəmadi artırılmasının lehinə çıxış edir. Çünki kapitalın yetərliliyi bankın ümumi etibarlılığını qiymətləndirməyə əsas verir.

Ekspertlərin fikrincə, məhz bu göstərici bankın əmanətçilərə maddi ziyan vurmadan hansı səviyyədə zərəri maliyyələşdirmək iqtidarında olduğunu əks etdirir.

Aşağıdakı cədvəldə ölkədəki bankların kapitalın yetərliliyi əmsalı (01.04.2009-cu il vəziyyətinə) barədə məlumat verilir:

Banklar		Məcmu kapital / Aktivlər (%)
1	Azfinansbank	92,43
2	Kövsər Bank	60,79
3	Paşa Bank	54,62
4	Azərbaycan Kredit Bankı	46,42
5	Bank Avrasiya	44,85
6	United Credit Bank	41,29
7	Günay Bank	41,14
8	Gəncə Bank	39,48
9	Deka Bank	38,61
10	NBCBank	38,49
11	Melli İran Bankı Bakı	37,70
12	Əmrahbank	36,71
13	YapıKredi Bank Azerbaijan	35,70
14	Atrabank	31,94
15	Qafqaz İnkişaf Bankı	31,00
16	Debut Bank	30,34
17	Kredo Bank	29,57
18	Azər-Türk Bank	29,20
19	Azərbaycan Sənaye Bankı	27,84
20	Azərnəqliyyatbank	25,11
21	Turan Bank	23,34
22	Kapital Bank	22,47
23	AccessBank	20,31
24	Royal Bank	19,23
25	Muğan Bank	18,78
26	UniBank	18,41
27	Azerdemiryolbank	18,09
28	Bank of Baku	17,81
29	Bank of Azerbaijan	17,29
30	Xalg Bank	16,14
31	Para Bank	15,97
32	AGBank	15,33
33	Bank Standard	14,72
34	AtaBank	14,58
35	Rabitabank	14,05
36	Bank Respublika	13,42
37	Texnikabank	13,40
38	Azərbaycan Beynəlxalq Bankı	11,82
39	Nikoil Bank	10,72
40	Zamin Bank	10,07

Cədvəldən göründüyü kimi, hazırda Azərbaycanda faktiki olaraq 46 bank kredit təşkilatı fəaliyyət göstərsə də, «APA-Economics»in renkinqində yalnız 40 bankın göstəriciləri əks olunub. Bu, digər bankların KİV-lə əməkdaşlıqdan imtina etməsi, maliyyə göstəricilərini təqdim etməməsi və digər subyektiv səbəblərlə bağlıdır.

Kapitalın yetərliliyi əmsalına gəldikdə isə, ilk yeri respublikanın ən iri bankı - Azərbaycan Beynəlxalq Bankı (ABB) deyil, «AzfinansBank» tutub. Belə ki, bu bank üzrə kapitalın yetərliliyi əmsalı 92,42%-ə bərabərdir («Azfinansbank» məcmu kapital üzrə renkinqdə 39-cu yeri tutub). ABB isə 11,82% göstəricisi ilə 37-ci pillədə qərarlaşıb.

Lakin nəzərə almaq lazımdır ki, beynəlxalq təcrübəyə əsasən, kapitalın yetərliliyi əmsalının 10-20% civarında olması daha məqsədə uyğundur və bu, bankın etibarlı olduğunu göstərir. Həmin əmsalın həddindən artıq yüksək olması isə əksər hallarda bankların aktivlər cəlb etmək sahəsində mövcud problemləri ilə bağlıdır. Yəni, yuxarıdakı renkinqin ikinci yarısında yerləşən bankların vəziyyətini müsbət qiymətləndirmək mümkündür.