Maliyyə

Ana səhifə

Maliyyə

Azərbaycan Dövlət Gömrük Komitəsinin sədri Aydın Əliyev: «Ümid edirəm ki, bu ilin sonuna proqnozları tam yerinə yetirəcəyik»

12 iyun 2009 07:56 (UTC +04:00)

Bakı. Nicat Mustafayev – APA-Economics. Azərbaycan Dövlət Gömrük Komitəsi (DGK) 2009-cu ildə gömrük vergi və rüsumlarının toplanması üzrə büdcə proqnozlarının tam həcmdə yerinə yetiriləcəyinə ümid edir.

DGK-nın sədri Aydın Əliyevin «APA-Economics»ə verdiyi məlumata görə, 2009-cu ilin əvvəlindən daxil olan gömrük vergi və rüsumlarında bir qədər azalma müşahidə olunur və büdcə proqnozlarının yerinə yetirilməsində bir qədər çətinlik yaranıb: «Lakin bu ayın ilk dekadasında bir balaca dirçəlmə müşahidə olunur. Bundan başqa, hazırda dünyada neftin qiymətinin 70 ABŞ dollarına çatması da proqnozların yerinə yetiriləcəyinə ümid verir. Ümid edirəm ki, bu ilin sonuna proqnozları tam yerinə yetirəcəyik».

A.Əliyev onu da qeyd edib ki, 2009-cu ilin ilk dörd ayında Azərbaycana idxal olunan mal və məhsulların həcmi 8,3% azalıb: «İlin ilk 3 ayının nəticələrinə baxsaq görərik ki, minik avtomobillərinin idxalı 43% azalıb. Hazırda isə bu rəqəm yarıya çatıb. Bu amillər də bizə proqnozları yerinə yetiriləcəyinə ümid yaradır».

Xatırladaq ki, cari ilin yanvar-aprel aylarında Azərbaycana 21 871 ədəd minik avtomobili gətirilib. Ötən ilin müvafiq dövrü ilə müqayisədə Azərbaycana gətirilən minik avtomobillərinin sayı 2,7%, idxal olunan avtomobillərin dəyər ifadəsi isə 12,8% azalıb.

Qeyd edək ki, DGK-nın proqnozlarına görə, 2009-cu ilin sonunadək 1,5 mlrd. manat həcmində gömrük vergi və rüsümları daxil olmalıdır.