Maliyyə

Ana səhifə

Maliyyə

«Azərdəmiryolbank» xaricdən yeni kredit cəlb edib

12 iyun 2009 08:57 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) ilə Hollandiyanın İnkişaf Maliyyə Şirkəti (FMO) arasında 7,5 mln. ABŞ dolları həcmində subordinasiya olunmuş kreditinin cəlb edilməsinə dair saziş imzalanıb.

Bankın baş ofisindən «APA-Economics»ə verilən məlumata görə, müqavilə üzrə vəsait bankın ikinci dərəcəli kapitalının artırılmasına yönəldiləcək.

Bu müqavilə uzunmüddətli dövrdə «Azərdəmiryolbank»ın resurs bazasının həcminin və diversifikasiya səviyyəsinin artırılmasına, eləcə də bankın kredit əməliyyatlarının genişləndirilməsinə imkan verəcək.

Bankın İdarə Heyətinin sədr müavini Yusif Cabbarovun sözlərinə görə, dünyada mövcud iqtisadi vəziyyəti nəzərə alaraq, aparıcı beynəlxalq maliyyə təşkilatlarından biri ilə uzunmüddətli və irihəcmli müqavilənin imzalanması Azərbaycan bankına olan etibarın göstəricisidir.

Qeyd edək ki, «Azərdəmiryolbank» Hollandiya İnkişaf Maliyyə Şirkəti (FMO) ilə 2007-ci ildən əməkdaşlıq edir. Artıq 2007-ci ilin noyabr ayında FMO «Azərdəmiryolbank»ın səhmdarları sırasına daxil olub.

Xatırladaq ki, «Azərdəmiryolbank» SKB-nin 850-yə yaxın səhmdarı var. Bankın nizamnamə kapitalında «25%+1 səhm» paketi Avropa Yenidənqurma və İnkişaf Bankı (EBRD), 10% FMO, 10% hüquqi şəxslərə, qalanı isə fiziki şəxslərə məxsusdur.

Bank 1989-cu ildə təsis edilib və hazırda respublika üzrə 29 filialı, 40 bankomatı və 240 POS-terminalı fəaliyyət göstərir.

Cari ilin aprelin 1-nə bankın aktivlərinin həcmi 213,029 mln. manat, depozit portfeli 56,923 mln. manat, kredit portfeli 157,354 mln. manat, məcmu kapitalı 38,538 mln. manat, o cümlədən nizamnamə kapitalı 13,400 mln. manat təşkil edib.