Maliyyə

Ana səhifə

Maliyyə

Millət vəkili Nazim Məmmədov: «Azərbaycan Vergi Məcəlləsinə təklif olunan dəyişikliklər sosial-iqtisadi inkişafa əlavə stimul verəcək»

12 iyun 2009 10:47 (UTC +04:00)

Bakı. Elbrus Seyfullayev, Vahab Rzayev – APA-Economics. Azərbaycan Milli Məclisinin iqtisadi siyasət komitəsi tərəfindən bu günlərdə müzakirə olunaraq parlamentin plenar iclasında baxılmaq üçün tövsiyə olunan yeni qanun layihələri əsasən Mərkəzi Bankın səlahiyyətinin artırılması və bəzi vergi dərəcələrinin azaldılmasını nəzərdə tutur. Bu barədə «APA-Economics»ə açıqlamasında millət vəkili Nazim Məmmədov məlumat verib.

N.Məmmədovun sözlərinə görə, «Milli Bank haqqında» qanuna təklif edilən dəyişikliklərin mahiyyəti diqqət cəlb edir. Belə ki, hazırda Mərkəzi Bank kommersiya banklarına yalnız 6 aylıq kreditlər vermək səlahiyyətinə malikdir. Qlobal iqtisadi böhran şəraitində real sektorda vəsait çatışmazlığı hiss olunur, bunun da əsas səbəblərindən biri bankların kapitallaşmasının arzu olunan səviyyədə olmaması və ucuz maliyyə resurslarına çıxışın zəif olması ilə bağlıdır. «Azərbaycanın kifayət qədər valyuta ehtiyatları mövcuddur. Təkcə Mərkəzi Bankın ehtiyatları 6 mlrd. dollardan çoxdur. Bu dəyişiklik qüvvəyə mindikdən sonra AMB-nin kredit vermək imkanları genişlənəcək. Bütün bunlar antiböhran tədbiri olaraq reallıqda sənayenin, həmçinin qeyri-neft sektorunun davamlı inkişafına əlavə stimul verəcək».

Bununla yanaşı, Mərkəzi Banka kommersiya banklarında depozit yerləşdirmək hüququ verilir. «Bu, həm milli, həm də xarici valyuta şəklində aparıla bilər. Eyni zamanda, qanunda bankın adının dəyişdirilməsi məsələsi də əksini tapıb», - deyə millət vəkili vurğulayıb.

Vergi Məcəlləsinə təklif olunan əlavə və dəyişikliklərə gəldikdə, N.Məmmədov bildirib ki, təklif edilən 46 əlavə və dəyişiklikdən demək olar ki, 19-u vergi ödəyicilərinin hüquqlarının artırılması və mənafelərinin qorunması, 16-sı vergi inzibatçılığının təkmilləşdirilməsi, 7-si vergi nəzarətinin gücləndirilməsi, 4-ü redaktə xarakterlidir. Belə ki, fiziki şəxslərin gəlir vergisinin (gəlir 2 min manatdan çox olduqda) maksimal dərəcəsinin 35%-dən 30%-ə endirilməsi nəzərdə tutulur. Bu dəyişikliyin qeyri-sahibkarlıq fəaliyyəti üzrə illik gəlir vergisi üzrə də aparılması təklif olunur.

Bununla yanaşı, hüquqi şəxs yaratmadan sahibkarlıq fəaliyyətini həyata keçirən fiziki şəxslərin vergiyə cəlb edilən gəlirlərindən 20% dərəcəsi ilə verginin tutulması, mənfəət vergisinin isə 22%-dən 20%-ə endirilməsi təklif edilir.

«Bütün bu dəyişikliklərə baxmayaraq, bəzən vergi ödəyicilərinə aidiyyəti olmayan qurumlar tərəfindən yersiz müdaxilələr hələ də mövcuddur. Bu işlərlə dövlət başçısının tövsiyəsində deyildiyi kimi, Vergilər Nazirliyi məşğul olmalıdır», - deyə millət vəkili əlavə edib.

N.Məmmədov həmçinin qeyd edib ki, təklif olunan dəyişikliklər sırasında ƏDV-nin 18%-dən 17%-dək azaldılması məsələsi də olub, lakin sonradan bu məsələ gündəlikdən çıxarılıb: «ƏDV-nin 1 faiz bəndi azaldılması prinsipcə heç nəyi dəyişmir. Azərbaycanın ticarət tərəfdaşı olan ölkələrdə ƏDV Azərbaycanla müqayisədə aşağı deyil və hazırkı 18% dərəcəsi normal bir göstəricidir. Məsələyə kompleks yanaşmaq lazımdır. Həmişə nəzərə almaq lazımdır ki, idxal-ixrac əməliyyatları apardığın ölkədə hansı həddə vergi tətbiq olunur. Ondan aşağı həddin müəyyənləşdirilməsi mənfi hallar doğura bilər».