Maliyyə

Ana səhifə

Maliyyə

«Texnikabank» aktivlərin həcmini 448 mln. manata çatdırıb

12 iyun 2009 12:38 (UTC +04:00)

Bakı. Elnur Hüseynquluyev – APA-Economics. Azərbaycanın «Texnikabank» Səhmdar Kommersiya Bankının (SKB) aktivləri 2009-cu ilin iyun ayının 1-nə 447,6 mln. manat, ilin əvvəlindən aktivlərin gəlirliliyi isə 1,93% təşkil edib.

Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 344,5 mln. manat təşkil edib ki, bu da ilin əvvəlinə nisbətən 5% çoxdur. Kreditlərin strukturunda bankın fiziki şəxslərə təqdim etdiyi istehlak kreditlərinin həcmi isə 60,7 mln. manat təşkil edib.

Bu ilin may ayı ərzində bankın depozit portfelinin həcmi 3,5% artaraq iyunun 1-nə 140,9 mln. manata çatıb. Ay ərzində müddətli depozitlər üzrə artım isə 8% təşkil edib. May ayının sonuna əhalinin əmanətlərinin həcmi 80,2 mln. manat olub və bunun 87,1%-i müddətli əmanətlərin payına düşür.

Həmçinin, bu müddət ərzində bankın məcmu kapitalı 15,3% artaraq 59,5 mln. manat, kapitalın gəlirliyi isə 15,92% təşkil edib.

Qeyd edək ki, cari ilin may ayı ərzində bankın ümumi gəlirləri 15,64% artaraq 28,7 mln. manat, o cümlədən ay ərzində faiz gəlirlərinin artımı 23,12% olub. Hesabat dövrünün sonuna bankın xalis mənfəəti 8,5 mln. manat təşkil edib.

Xatırladaq ki, «Texnikabank» SKB 1993-cü ildən fəaliyyət göstərir. Bankın respublika üzrə 16 filialı, 48 bankomatı və 340 POS-terminalı var.