Maliyyə

Ana səhifə

Maliyyə

«Doing Business-2010» hesabatının müəllifi Svetlana Baqautdinova: «Ümid edirəm ki, Azərbaycan gələn ilki reytinqində daha yüksək yer tutacaq»

10 sentyabr 2009 09:17 (UTC +04:00)

Bakı. Nicat Mustafayev – APA-Economics. Bu gün Bakıda Dünya Bankı (DB) və Beynəlxalq Maliyyə Korporasiyası (IFC) tərəfindən hazırlanmış «Biznesin aparılması – 2010: Çətin vaxtda islahatlar» («Doing Business-2010») adlı illik hesabatın təqdimatı və hesabatın müəllifi ilə videokonfrans keçirilib.

«APA-Economics»in məlumatına görə, videokonfransa DB-nın Azərbaycanla yanaşı, Qazaxıstan, Qırğızıstan, Özbəkistan və Tacikistandakı ofisləri də qoşulmuşdur. Tədbirdə DB-nın Moskva ofisindən onlayn rejimdə qoşulan «Doing Business-2010» hesabatının müəllifi xanım Svetlana Baqautdinova regiondakı ölkələrə verilmiş reytinq, biznes üçün ən əlverişli ölkələr və son illər ərzində daha çox islahat aparmış ölkələr haqqında məlumat verib. Müəllif qeyd edib ki, yeni hesabatda metodologiya dəyişikliyi, iki yeni ölkənin (Kipr və Kosovo) əlavə olunması və s. amillər reytinqdə yer almış ölkələrin yerini bir qədər dəyişib.

Azərbaycana gəldikdə isə S.Baqautdinova bildirib ki, ölkə hesabat siyahısında regionda aparıcı yerlərin birində qərarlaşıb ki, buna da əsasən xarici ticarət aparma sahəsində həyata keçirilən islahatlar (gömrükdə «bir pəncərə») səbəb olub: «Azərbaycan bu sahədə artıq 3-4 ildir islahatlar aparır. Bunun nəticəsində gömrük məntəqələrində tam kompüterləşmə aparılıb, idxal-ixrac əməliyyatlarının müddəti 6 günədək endirilib, həmçinin burada vəsait xərcləri də aşağı salınıb».

Bundan başqa, S.Baqautdinova qeyd edib ki, Azərbaycanın reytinqdə aparıcı yerlərdə olmasına həmçinin kredit bazarına çıxış sahəsində aparılan islahatlar da səbəb olub: «Ümid edirəm ki, Azərbaycan islahatların həyata keçirilməsini davam etdirəcək və gələn ilki hesabatın reytinqində daha yüksək yerdə qərarlaşacaq».

Qeyd edək ki, «Doing Business-2010» hesabatında Azərbaycan 5 pillə geriləyib. Əgər 2007-ci ilin iyul ayından 2008-ci ilin iyun ayınadək Azərbaycan hesabatın araşdırdığı 10 sahənin 7-də islahatlar həyata keçirmişdirsə və «Doing Business-2009» hesabatında sahibkarlıq fəaliyyətinin əlverişliliyi baxımından dünya reytinqində ən böyük yüksəliş əldə edərək 97-ci yerdən 33-cü yerə yüksəlmişdirsə, artıq «Doing Business-2010» hesabatında ölkəmiz 38-ci yerdə qərarlaşıb.

Bundan başqa, 2010-cu ilin hesabatında Azərbaycan yeni müəssisələrin təsis edilməsi indikatoruna görə 17-ci yeri (ötən il - 13-cü yer), tikinti üçün icazələrin verilməsinə görə 158-ci yeri (155), işə qəbul indikatoruna görə 33-cü yeri (15), əmlakın qeydiyyatı indikatoruna görə 9-cu yeri (9), kreditlərin alınması aspekti üzrə 15-ci yeri (12), investorların hüquq və maraqlarının qorunması üzrə 20-ci yeri (18), vergi ödənişi indikatoruna görə 108-ci yeri (102), gömrük rəsmiləşdirilməsi üzrə 177-ci yeri (174), müqavilələrin icrasının təmin edilməsi aspektinə görə 26-cı yeri (26), biznesin bağlanması indikatoruna görə isə 84-cü yeri (81) tutub. Göründüyü kimi, əksər parametrlər üzrə Azərbaycanın mövqeyi zəifləyib.

Qeyd edək ki, qiymətləndirmədə makroiqtisadi siyasət, infrastrukturun keyfiyyəti, valyutanın sabitliyi, investor cəlbediciliyi və cinayətkarlıq səviyyəsi kimi aspektlər əks olunmayıb.

Xatırladaq ki, «Doing Business»in 183 ölkə üzrə göstəriciləri biznes üçün tələb olunan xərcləri göstərir və 10 region üzrə tənzimləyici mühiti müqayisə edir. Bu da siyasəti müəyyən edən orqanlara dünyada olan qabaqcıl təcrübəni öyrənməyə və prioritet islahatları müəyyənləşdirməyə kömək edir.