Maliyyə

Ana səhifə

Maliyyə

Azərbaycanın xarici ticarət dövriyyəsinin müsbət saldosu I rübdə 3 dəfə artıb

19 aprel 2010 13:28 (UTC +04:00)

Bakı. Rəşad Süleymanov – APA-Economics. Cari ilin yanvar-mart aylarında Azərbaycanın xarici ticarət dövriyyəsində 3 350 848,1 min ABŞ dolları müsbət saldo yaranıb ki, bu da 2009-cu ilin müvafiq göstəricisindən 2,8 dəfə çoxdur. Bu barədə «APA-Economics»ə Dövlət Gömrük Komitəsindən məlumat verilib.

Hesabat dövründə 112 ölkə ilə aparılmış ticarət əməliyyatlarının həcmi 5 667 674,9 min dollar təşkil edib. Bu müddət ərzində 4 509 261,5 min dollar dəyərində mal ixrac, 1 158 413,4 min dollar dəyərində mal isə idxal olunub. O cümlədən, respublikaya 5 641,1 min dollar dəyərində 469,1 ton əmtəə dövlət, hökumət və beynəlxalq təşkilatların xətti ilə təmənnasız kömək, humanitar yük və texniki yardım kimi daxil olub.

Hesabat dövründə 2009-cu ilin I rübünə nisbətən ixrac əməliyyatlarının həcmi 81,65% artıb, idxal əməliyyatlarının həcmi isə 12,60% azalıb.

Müvəqqəti ixrac rejimində Azərbaycandan 33 810,9 min dollar dəyərində mal ixrac edilib, 72 734,1 min dollar dəyərində mal isə ölkəyə müvəqqəti idxal olunub.

İxracın struktrunda əsas yeri xam neft (84,61%), neft məhsulları (6,72%), bitki və heyvan mənşəli yağlar (1,23%), idxalda isə maşın və elektrik aparatları, avadanlıqlar, elektrotexniki avadanlıqlar və onların ehtiyat hissələri (27,77%), ərzaq məhsulları (17,63%), nəqliyyat vasitələri və onların hissələri (12,34%), qara metallar və onlardan hazırlanan məmulatlar (7,44%) və s. tutub.

Qeyd edək ki, hesabat dövründə xarici ticarətlə 3 393 hüquqi və fiziki şəxs məşğul olub. İxrac əməliyyatlarında dövlət sektorunun payı 93,08%, özəl sektorun 6,67%, fiziki şəxslərin payı isə 0,25% olub. İdxal əməliyyatlarında isə bu göstərici müvafiq olaraq 28,08%, 65,78% və 6,14% təşkil edib.