Maliyyə

Ana səhifə

Maliyyə

ÜTT-yə üzvlük Azərbaycanda bank faiz dərəcələrini, rüsum və tarifləri aşağı sala bilər

27 aprel 2010 11:40 (UTC +04:00)

«APA-Economics»in məlumatına görə, bunu ABŞ-ın Beynəlxalq İnkişaf Agentliyinin (USAİD) dəstəyi ilə «Azərbaycanın ÜTT-yə üzvlüyü və mətbuat» mövzusunda keçirilən seminarda ÜTT-yə üzvlük prosesi üzrə beynəlxalq ekspert Fərhad Fərhad bildirib.

F.Fərhadın sözlərinə görə, USAİD Azərbaycanda Ticarət və İnvestisiya İslahatlarına Dəstək Proqramı çərçivəsində müxtəlif dövlət orqanlarının iştirakı ilə ekonometrik layihə hazırlayıb. Bu layihədə ÜTT-yə üzvlüyün təsirləri araşdırılıb.

Ekspert hesab edir ki, ÜTT-yə üzv olduqdan sonra rüsum və tariflərin, məsələn, yarıbayarı azaldılması əsas götürülərək bəzi proqnozlar hazırlanıb. Belə ki, qəbuldan sonrakı 2 il ərzində qeyri-neft sektorunda istehsalın 2,44%, rüsumların azaldılması nəticəsində idxala tələbatın təxminən 8% artacağı proqnozlaşdırılır.

«Bununla yanaşı, Azərbaycan məhsullarına xaricdə tətbiq olunan rüsum dərəcələri mövcud 13%-dən 9%-ə enəcək. Ancaq yerli istehsalçıların satışı 1% azalacaq. İxracatın artması ümumi daxili məhsulu 1,03% artıracaq», - deyə ekspert vurğulayıb.

Bununla yanaşı, bank faiz dərəcələrinin 5% civarında azalması gözlənilir ki, bu da sahibkarlığın inkişafına imkanlar yaradacaq. Vergi bazasının genişlənməsi və vergi ödəyicilərinin sayının artımı da proqnozlaşdırılır.

F.Fərhad onu da əlavə edib ki, ÜTT-yə üzvlüyün təsirlərinə ən çox bazarda inhisarçı mövqeyinə malik olan şirkətlər və səmərəli fəaliyyət göstərməyən müəssisələr məruz qalacaq. Lakin yaranmış rəqabət fonunda qiymətlərdə ucuzlaşma baş verəcək.

F.Fərhadın sözlərinə görə, hər bir dövlət ÜTT-yə üzv olduqda, ölkə iqtisadiyyatı üçün «həssas məhsullar»ı da müəyyənləşdirir. Azərbaycan isə müzakirələrdə 70-ə yaxın «həssas məhsul» təqdim edir ki, bu da ÜTT-yə üzv dövlətlər tərəfindən müsbət qarşılanmır. ÜTT təcrübəsində ən çox halda 10-dək məhsul götürülür ki, ölkə iqtisadiyyatı üçün əhəmiyyət kəsb edən həmin məhsullarla bağlı istehsal, idxal-ixrac problemi yarandıqda müvafiq qərarlar qəbul edə bilir.

Ekspert qeyd edib ki, daha bir neçə qonşu ölkənin Azərbaycandan əvvəl ÜTT-yə üzv olması rəsmi Bakının qarşısına üzvlük prosesində yeni şərtlər və tələblər qoya bilər.