Maliyyə

Ana səhifə

Maliyyə

AİB Azərbaycanın 5 bankına Ticarətin Maliyyələşdirilməsi Mexanizmi Proqramı çərçivəsində vəsait ayıracaq

28 aprel 2010 10:41 (UTC +04:00)

Bakı. Nicat Mustafayev - APA-Economics. Bu gün Bakıda Asiya İnkişaf Bakı (AİB) Ticarətin Maliyyələşdirmə Mexanizmi Proqramı (TMMP) çərçivəsində Azərbaycanın 5 bankı ilə ticarətin maliyyələşdirilməsi sazişlərini imzalayıb.

“APA-Economics”in məlumatına görə, AİB sözügedən sazişi “Bank of Baku”, “Access Bank”, “AGBank”, “Dəmir Bank” və “Bank Respublika” ilə imzalayıb. Yeni sazişə əsasən AİB “Bank of Baku”ya 1 mln. ABŞ dolları, “AGBank”a 4 mln. dollar, “DəmirBank”a 5 mln. dollar, “Bank Respublika”ya 1 mln. dollar ayıracaq, “Access Bank” üçün isə AİB qarant şəklində çıxış edəcək.

Qeyd edək ki, 2006-2008-ci illər ərzində Azərbaycanın 4 bankı (“Access Bank”, “AGBank”, “Bank of Baku” və “Bank Respublika”) bu proqramda iştirakla bağlı müqavilə imzalayıb. İlkin büdcəsi 1 mlrd. ABŞ dolları olan TMMP proqramı ticarətin dəstəklənməsi məqsədilə beynəlxalq və üzv ölkələrin bankları ilə əməkdaşlıq etməklə maliyyə və bank təminatı verir.

Xatırladaq ki, 2004-cü ildən icrasına start verilən bu proqramın portfeli rellover tipli olduğundan və özəl sektoru cəlb etdiyindən, 2013-cü ilə qədər ticarətin maliyyələşdirilməsinə ümumilikdə 15 mlrd. dollar sərf olunacaq. Ötən il TMMP çərçivəsində ticarət əqdləri üçün 1,9 mlrd. dollar məbləğində vəsait təmin edilib ki, bu da 2008-ci illə müqayisədə 4 dəfə çoxdur və 263 kiçik və orta həcmli müəssisələr tərəfindən həyata keçirilən əməliyyatlar maliyyələşdirilib.