Maliyyə

Ana səhifə

Maliyyə

«Paşa Sığorta» nizamnamə kapitalını 20 mln. manata çatdırıb

29 aprel 2010 14:14 (UTC +04:00)

Bakı. Elnur Hüseynquluyev - APA-Economics. Azərbaycan Vergilər Nazirliyi «Paşa Sığorta» ASC-nin nizamnamə kapitalının 2,2 dəfə artaraq 20 mln. manatadək artırılmasını qeydiyyata alıb.

Şirkətin baş ofisindən «APA-Economics»ə verilən məlumata görə, sığortaçının nizamnamə kapitalının artırılması 2009-cu ilin gəlirlərinin kapitala investisiya olunması və şirkətin səhmdarları tərəfindən əlavə investisiya hesabına həyata keçirilib.

Şirkətin İdarə Heyətinin sədri Nofəl Rzayevin sözlərinə görə, nizamnamə kapitalının artırılması üçillik inkişaf planı çərçivəsində şirkətin Direktorlar Şurasının tövsiyəsi əsasında və sığortaçıların nizamnamə kapitalının artırılması üzrə dövlətin həvəsləndirmə siyasətinə uyğun olaraq həyata keçirilib.

«Kapitalın hazırkı artımı bizim maddi-texniki bazamızın daha da güclənməsi və risklərin saxlanması üzrə gücümüzün artırılması üçün şərait yaradır. Bazarın inkişafı baxımından isə biz kapital artımını qərbin müasir sığorta məhsullarının Azərbaycanın sığorta təcrübəsinə cəlb olunması və inteqrasiyası planlarının reallaşdırılması üçün vacib imkanlardan biri kimi qiymətləndiririk. “Paşa Sığorta” sığorta şirkətlərinin kapitalının artırılmasına istiqamətlənmiş siyasəti dəstəkləyir və gələcəkdə cari işlərin nəticələrinə uyğun olaraq kapitalın artırılmasını davam etdirəcək», – deyə N. Rzayev qeyd edib.

Xatırladaq ki, «Paşa Holding» Şirkətlər Qrupuna daxil olan «Paşa Sığorta» şirkəti 2006-cı ildən fəaliyyət göstərir.