Maliyyə

Ana səhifə

Maliyyə

Azərbaycan parlamentinin komitə sədri Hadı Rəcəbli: «SSRİ dövründən qalan bank əmanətlərinin qaytarılması diqqət mərkəzindədir»

30 aprel 2010 11:10 (UTC +04:00)

Bakı. Laçın Sultanova – APA-Economics. Azərbaycanda SSRİ dövründən banklarda əmanəti olan şəxslərə həmin vəsaitin 2010-cu ildə qaytarılması məsələsi gündəmdə deyil və bunun üçün dövlət büdcəsində vəsait nəzərdə tutulmayıb. APA-nın məlumatına görə, bunu Milli Məclisin sosial siyasət komitəsinin sədri Hadı Rəcəbli bildirib.

Əmanətlərlə bağlı bir sıra məsələlərə aydınlıq gətirən komitə sədri bu mövzunun diqqət mərkəzində olduğunu, məsələ ətrafında dövlət qurumları səviyyəsində müzakirələrin aparıldığını qeyd edib. H.Rəcəblinin sözlərinə görə, xüsusi komissiya bununla bağlı işlər aparır.

H.Rəcəbli əmanətlərin qaytarılmasının çox həssas məsələ olduğunu vurğulayıb. Millət vəkili hesab edir ki, böyük narazılıqlara səbəb olmamaq üçün təmkinli addımlar atılmalıdır.

«Ola bilər hansısa məqamda bu məsələ öz həllini tapsın. Əmanətlərin varislik prinsipi qorunub – yəni, dünyasını dəyişən adamın əmanəti varislərinə verilə bilər. Bu çox ciddi məsələdir. Digər tərəfdən, Azərbaycandan gedən 200 min erməni var. Ermənistandan isə 230 min azərbaycanlı ölkəyə gəlib. Onlar başqa ölkədən gəliblər, onların sənədləri haradadır? Bizdə əmanət banklarının da arxivləri dağılıb. Saxta sənəd təqdim edən adamların sayı da artır», - deyən H.Rəcəbli araşdırmalar zamanı qarşıya çıxan problemlərdən də danışıb.

Milli Məclisin komitə sədri həmçinin bildirib ki, əmanətlərlə insanların həmin dövrdə aldıqları maaşlar tutaşdırılır. Amma burada da qaranlıq və sual doğuran məqamlar var: «Necə olur ki, ayda 60 manat maaş alan insanın bankda 60 min manat pulu olsun, bu məntiqə uyğundurmu? Bu qara puldur. Amma bütövlükdə əmanət kassalarına dövlətə inanan adamlar, çətin dövr üçün pul saxlayan adamlar pul qoyurdular».

H.Rəcəbli bildirib ki, əmanətlərin indeksləşdirilməsində və qaytarılmasında dünya təcrübəsi də öyrənilir. Belə ki, bəzi ölkələrdə əmanətləri 2 min dollara gədər olanlara vəsaiti ilk mərhələdə, əmanəti 5 minə gədər olanları isə sonrakı mərhələdə qaytarıblar. Ən yüksək əmanətləri sona saxlanıb, yaxud verilməyib. Həmin pulun hansı mənbələrdən əldə edildiyi araşdırıb, təhlil olunub.

Qeyd edək ki, ilkin hesablamalara görə Azərbaycanda əhalinin sovet dövründə banklara qoyduğu əmanətləri qaytarmaq üçün təxminən 800 mln. ABŞ dolları vəsait tələb olunur.