Maliyyə

Ana səhifə

Maliyyə

AZPROMO İnvestisiyanın Təşviqi Agentliklərinin Dünya Assosiasiyasının Direktorlar Şurasına üzv seçilib

05 iyul 2010 16:38 (UTC +04:00)

Bakı - APA-Economics. İyunun 28-30-da Argentinanın Buenos-Ayres şəhərində İnvestisiyanın Təşviqi Agentliklərinin Dünya Assosiasiyasının (WAIPA) 15-ci Dünya İnvestisiya Konfransı keçirilib.

Azərbaycan İqtisadi İnkişaf Nazirliyinin mətbuat xidmətindən “APA-Economics”ə verilən xəbərə görə, tədbirdə dünyanın bir çox ölkələrindən dövlət qurumlarının və özəl sektorun nümayəndələri, investisiyanın təşviqi agentliklərinin rəhbərləri, elmi və ictimai birliklərinin üzvləri iştirak edib.

Tədbirdə iqtisadi inkişaf prosesi, investisiyaların cəlb edilməsi sahəsində mövcud vəziyyət, maliyyə islahatları və investisiyaların maliyyələşdirilməsi mövzuları ilə bağlı müzakirələr aparılıb. Konfransda ölkəmizi təmsil edən Azərbaycanda İxracın və İnvestisiyaların Təşviqi Fondunun (AZPROMO) prezidenti Adil Məmmədov Azərbaycanın biznes mühiti və investisiya imkanlarına dair təqdimatla çıxış edib.

WAIPA-nın Direktorlar Şurasında AZPROMO İnvestisiyanın Təşviqi Agentliklərinin Dünya Assosiasiyanın Cənubi Qafqaz və Mərkəzi Asiya regionu üzrə üzv seçilib. 1995-ci ildə İsveçrənin Cenevrə şəhərində təsis edilmiş İnvestisiyanın Təşviqi Agentliklərinin Dünya Assosiasiyasının dünyanın 161 ölkəsindən olmaqla 245 üzvü var. WAIPA-nın Direktorlar Şurasında isə Braziliya, İspaniya, İtaliya, Sloveniya, Meksika, Argentina, Birləşmiş Ərəb Əmirlikləri, Çin, Kamerun və s. cəmi 11 ölkə təmsil olunur. Qeyd etmək lazımdır ki, Azərbaycan Respublikası Cənubi Qafqaz və MDB ölkələrindən WAIPA-nın Direktorlar Şurasına seçilən yeganə təmsilçidir.

WAIPA-nın əsas məqsədi investisiyanın təşviqi agentlikləri arasında əməkdaşlığın genişləndirilməsi, investisiyaların cəlb edilməsi sahəsində təcrübə və investisiya ilə bağlı məlumat mübadiləsi, investisiyanın təşviqi strategiyasının formalaşdırılmasında üzv təşkilatlara dəstək göstərməkdir. WAIPA-nın ali orqanı Direktorlar Şurasıdır. Assosiasiyanın Məsləhət Şurasının üzvləri - BMT agentlikləri, İƏİT (İqtisadi Əməkdaşlıq və İnkişaf Təşkilatı), FİAS (Xarici İnvestisiyalar üzrə Məsləhət Xidməti), IEDC (Beynəlxalq İqtisadi İnkişaf Şurası), PROINVEST təşkilatları və “Ernest & Young”,“GDP Global”, İBM”, “Buck Consultants International” və “Investment Consulting Associates” kimi nüfuzlu şirkətlərdir.

AZPROMO-nun WAIPA-nın Direktorlar Şurasında təmsil olunması Azərbaycanda əldə olunmuş uğurlar, davam etdirilən iqtisadi islahatlar barədə məlumat mübadiləsi, investisiya imkanlarının daha geniş təşviq edilməsi, dünyanın bir çox analoji agentlikləri ilə AZPROMO-nun birbaşa əməkdaşlıq əlaqələrinin qurulması, həmçinin regionda fəaliyyətinin daha da genişləndirilməsi imkanları yaradır.