Maliyyə

Ana səhifə

Maliyyə

«Unibank» nizamnamə kapitalını yenidən artırır

07 iyul 2010 09:47 (UTC +04:00)

Bakı. Elnur Hüseynquluyev - APA-Economics. Azərbaycanın «Unibank» ASC-nin səhmdarları tərəfindən bankın nizamnamə kapitalının 39% və ya 11,592 mln. manat artırılaraq 41,592 mln. manata çatdırılması barədə qərar qəbul edilib.

Bankın baş ofisindən «APA-Economics»ə verilən məlumata görə, bankın nizamnamə kapitalının həcmi hər birinin nominal dəyəri 2 manat olan 5 796 000 ədəd sadə adsız sənədsiz səhmin emissiyası yolu ilə artırılacaq. Səhmlərin yerləşdirilməsindən sonra bankın nizamnamə kapitalı 39% artacaq 41,592 mln. manata çatacaq.

Qeyd edək ki, bu emissiya 1993-cü ildən başlayaraq bankın fəaliyyəti tarixində 16-cı və 2009-cu ilin yazında başa çatmış, ümumi həcmi 15 mln. manat olan səhm buraxılışından sonra ən iri emissiya olacaq. Gözlənilən səhm buraxılışı «Unibank» ASC-nin səhmdar kapitalının strukturunu dəyişməyəcək. Çünki səhmlər, Avropa Yenidənqurma və İnkişaf Bankı və «DEG» Alman invesitisiya qrupu da daxil olmaqla, bankın mövcud səhmdarları tərəfindən əldə ediləcək.

Xatırladaq ki, «Unibank» ASC 1992-ci ildən fəaliyyət göstərir. Cari ilin aprelin 1-nə bankın aktivlərinin həcmi 347,378 mln. manat, depozit portfeli 145,873 mln. manat, kredit portfeli 220,705 mln. manat, məcmu kapitalı 57,075 mln. manat, o cümlədən nizamnamə kapitalı 30 mln. manat təşkil edib. Hazırda bankın 25 filialı, 64 bankomatı və 244 POS-terminalı fəaliyyət göstərir.