Maliyyə

Ana səhifə

Maliyyə

Bakıda «bir pəncərə» prinsipi və biznes prosesinin təhlili üzrə potensialın gücləndirilməsi» mövzusunda seminar keçirilib

09 iyul 2010 13:30 (UTC +04:00)

Bakı. Nicat Mustafayev - APA-Economics. Bu gün Bakıda «bir pəncərə» prinsipi və biznes prosesinin təhlili üzrə potensialın gücləndirilməsi» mövzusunda seminar keçirilib.

Azərbaycan Dövlət Gömrük Komitəsindən (DGK) «APA-Economics»ə verilən məlumata görə, seminar BMT-nin Avropa üzrə İqtisadi Komissiyası, BMT-nin Asiya və Sakit Okean regionu ölkələri üçün İqtisadi və Sosial Komissiyası və Asiya İnkişaf Bankı tərəfindən təşkil olunub.

Tədbirə «bir pəncərə» prinsipinin tətbiqi ilə bağlı Azərbaycan nümunəsinin öyrənilməsi mövzusunda iyulun 6-8-də Bakıda keçirilmiş beynəlxalq seminarın iştirakçıları, o cümlədən Mərkəzi Asiya Regional İqtisadi Əməkdaşlıq (CAREC) proqramında iştirak edən ölkələrin dövlət və özəl sektorunun və beynəlxalq ticarət münasibətləri ilə məşğul olan şirkətlərin, eləcə də Azərbaycanda fəaliyyət göstərən işgüzar dairələrin nümayəndələri qatılıb.

Tədbirdə çıxış edən DGK-nın sədr müavini Əsgər Abdullayev qeyd edib ki, Azərbaycanda ticarətin dəstəklənməsi istiqamətində istifadə olunan vasitələrin ən önəmlilərindən biri də «bir pəncərə» prinsipinin reallaşması olub. Belə ki, dövlət sərhədinin buraxılış məntəqələrində «bir pəncərə» prinsipinin tətbiqi qısa dövr ərzində tam reallaşıb, müvafiq dövlət qurumları ilə əlaqələndirmə işi həyata keçirilib və onun elektron platforması müəyyənləşib: «Hazırda «bir pəncərə» alətinin tətbiqi vasitəsilə yoxlama və rəsmiləşdirmə prosedurlarının keyfiyyəti xeyli dərəcədə artıb, bu mexanizmin tətbiqindən həm dövlət, həm də özəl sektor, nəticə etibarilə isə cəmiyyətin faydalanmasına əsaslı zəmin yaranıb».

Tədbirdə çıxış edən BMT-nin Avropa üzrə İqtisadi Komissiyasının nümayəndəsi Markus Pikart seminarın aktual mövzuya həsr olunduğunu vurğulayıb və tədbirin sözügedən sahədə fikir və təcrübə mübadiləsi baxımdan əhəmiyyətli olacağını bildirib.

Öz növbəsində BMT-nin Asiya və Sakit Okean regionu ölkələri üçün İqtisadi və Sosial Komissiyasının nümayəndəsi Yann Düval qeyd edib ki, «bir pəncərə» prinsipi və biznes prosesinin təhlili üzrə potensialın gücləndirilməsi hər bir ölkənin gömrük xidməti üçün önəmli məsələdir və seminarda bu sahədə həllini gözləyən məsələlərə toxunulması ümumi işə töhfəsini verəcək.

Seminarda biznes proseslərinin təhlilinə giriş, biznes-proseslərin təhlili layihəsinin sahələrinin müəyyənləşdirilməsi, biznes proseslərinin layihəsinin planlaşdırılması, biznes proseslərinin modelləşdirilməsi və təhlilinin həyata keçirilməsi və s. mövzularda məruzələr dinlənilib.