Maliyyə

Ana səhifə

Maliyyə

«Atəşgah» şirkətinin sığorta haqlarının həcmi 35% artıb

19 may 2011 12:27 (UTC +04:00)

Bakı. Elnur Hüseynquluyev - APA-Economics. Azərbaycanın «Atəşgah» sığorta şirkətinin 2011-ci ilin yanvar-aprel aylarında topladığı sığorta haqlarının həcmi 5,060 mln. manat təşkil edib ki, bu da ötən ilin analoji dövrünün göstəricisi ilə müqayisədə 35% çoxdur.

Şirkətin baş ofisindən «APA-Economics»ə verilən məlumata görə, hesabat dövründə könüllü sığorta növləri üzrə 4,783 mln. manat, icbari sığorta növləri üzrə isə 277,377 min manat həcmində sığorta haqqı toplanılıb.

Təhlil aparılan dövr ərzində daxilolmalar üzrə ən çox sığorta haqqı «Avtonəqliyyat vasitələrinin sığortası» (2,237 mln. manat), «Əmlakın yanğından və digər risklədən sığortası» (1,165 mln. manat) və «Tibbi sığorta» (911,217 min manat) növlərinin payına düşüb. «Avtonəqliyyat vasitələrinin sığortası» növünün məcmu sığorta haqlarında xüsusi çəkisi 44,2%, «Əmlakın yanğından və digər risklədən sığortası» növünün payı 23% və «Tibbi sığorta» növünün xüsusi çəkisi isə 18% təşkil edib.

Şirkətdən bildirilib ki, son bir il ərzində sığorta hadisələri üzrə ödənilən vəsaitlərin həcmi 4,4% artaraq 1,723 mln. manata çatıb. Bu müddət ərzində 1,688 mln. manat könüllü sığorta növləri üzrə, 34,736 min manat isə icbari sığorta növləri üzrə ödənilib. Ödənişlərin strukturunda 791,807 min manat «Tibbi sığorta» növünün (məcmu ödənişlərdə xüsusi çəkisi 46%), 753,892 min manat «Avtonəqliyyat vasitələrinin sığortası»nın (43,8%) və 34,736 min manat isə «Nəqliyyat vasitəsi sahiblərinin mülki məsuliyyətinin icbari sığortası» (2%) növü üzrə ödənilib.

Xatırladaq ki, «Atəşgah» şirkəti 1996-cı ilin dekabrından fəaliyyət göstərir. Şirkətin səhmdarları rolunda «İSR Holding» (63%), «RanExim» şirkəti (27%) və ARDNŞ (10%) çıxış edir. Hazırda şirkətin nizamnamə kapitalı 3,7 mln. manat təşkil edir. Şirkətinin 8 ofisi fəaliyyət göstərir. Şirkət 17 könüllü və 4 icbari sığorta xidməti göstərir.