Maliyyə

Ana səhifə

Maliyyə

«PAŞA Həyat Sığorta» müştərilərinin maarifləndirilməsi istiqamətində fəaliyyətini davam etdirir

28 oktyabr 2011 07:29 (UTC +04:00)

Bakı. Elnur Hüseynquluyev – APA-Economics. Azərbaycanın «PAŞA Həyat Sığorta» ASC oktyabr ayının 13-16-da Bakıda əməkdaşlıq etdiyi iri müştərilərinin nümayəndələri üçün «OHSAS (Occupational Health and Safety Management System) 18001:2007 - Əməyin Mühafizəsi və Təhlükəsizliyinin (ƏMT) İdarəetmə Sistemi»nin tətbiqi mövzusunda təlim proqramları keçirib.

Şirkətin baş ofisindən «APA-Economics»ə verilən məlumata görə, təlim proqramları Almaniyanın sertifikatlaşdırma sahəsində fəaliyyət göstərən tanınmış «TÜV Thüringen e.V.», Türkiyənin «MEYER Belgelendirme Hizmetleri A.Ş.» və Azərbaycanın «AzeriCert» şirkətləri ilə birgə təşkil olunub.

Şirkətdən bildirilib ki, həmin tədbirin davamı olaraq oktyabrın 18-20-də İstanbulda (Türkiyə) «PAŞA Həyat Sığorta» ASC-nin təşkilatçılığı ilə «MEYER Belgelendirme Hizmetleri A.Ş.»nin təsisçisi Metin Yerebakanın rəhbərliyi ilə təlimçilər tərəfindən «İSO 31001:2009 – Risklərin İdarə Olunması Standartları (prinsiplər və direktivlər)» mövzusunda təlim proqramı keçirilib, təlimdə iştirak edən Azərbaycan Dövlət Neft Şirkətinin (ARDNŞ) əməkdaşları ilə təcrübə və fikir mübadiləsi aparılıb.

Tədbirdə həmçinin «Türk Hava Yolları» şirkətinin sərnişin təyyarələrinin cari və kapital təmirini həyata keçirən törəmə müəssisəsi olan «THY Teknik A.Ş.»nin iş sahələrində risklərin idarə olunması işinin təşkili təcrübəsi əyani olaraq öyrənilib.

Təlim proqramının yekununda ARDNŞ əməkdaşlarına «TÜV Thüringen e.V», «MEYER» və «AzeriCert» şirkətlərinin nümayəndələri tərəfindən sertifikatlar təqdim olunub.

Qeyd edək ki, «Paşa Həyat Sığorta» sığorta şirkəti 2010-cu il noyabrın 24-də dövlət qeydiyyatına alınıb, sığorta fəaliyyətinə lisenziya (5 illik) isə bu il fevralın 14-də verilib. Cari il iyunun 1-nə şirkətin nizamnamə kapitalı 7 mln. manat təşkil edir.