Maliyyə

Ana səhifə

Maliyyə

Böyük Britaniya maliyyə ödənişlərinə ümumavropa vergisinin tətbiqinə qarşı çıxıb

09 yanvar 2012 07:39 (UTC +04:00)

Bakı - APA-Economics. Böyük Britaniyanın baş naziri Devid Kemeron maliyyə ödənişlərinə ümumavropa vergisinin tətbiq olunması haqqında qanun layihəsinin qəbulunu əngəlləyəcəyini vəd edib. “APA-Economics”in “Reuters”ə istinadən xəbərinə görə, qanunun qəbulu üçün Avropa Birliyinin 27 ölkəsinin razılığı tələb olunur.

D.Kemeron bu təşəbbüsü dəstəkləmək üçün şərt də irəli sürüb: “Maliyyə ödənişlərinə bütün dünya üzrə vergi tətbiq olunarsa, Böyük Britaniya bunu dəstəkləməyə hazırdır. Hesab edirik ki, bu normanın yalnız AB ölkələrində tətbiq olunması ədalətsizdir. Əgər beynəlxalq birliyin digər üzvləri bu təşəbbüsü dəstəkləməsə, biz də dəstəkləməyəcəyik”.

O, yeni verginin tətbiq olunmasına çalışan Almaniya və Fransanın bunu birtərəfli qaydada qəbul etməkdə azad olduğunu bildirib: “Buna heç nə mane olmur”. Baş nazir digər Avropa ölkələrinin liderlərinə alternativ olaraq Böyük Britaniyada artıq mövcud olan bank vergilərini qəbul etməyi məsləhət görüb.

Qeyd edək ki, maliyyə ödənişlərinə vergi tətbiq olunması təklifi Avropa Komissiyası tərəfindən “qlobal böhranın mənfi nəticələrindən maliyyə yükünün ədalətli bölüşdürülməsi” məqsədilə irəli sürülüb. Verginin tətbiqi hər il ümumavropa büdcəsinə 55 mlrd. avro yönəltmək imkanı verəcək.