Maliyyə

Ana səhifə

Maliyyə

«Azərbaycan Sənaye Sığorta» şirkətinin daxilolmaları ötən il 30% artıb

11 yanvar 2012 12:06 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Sığorta» şirkətinin 2011-ci ildə topladığı sığorta haqlarının həcmi 6,694 mln. manat təşkil edib ki, bu da 2010-cu ilin analoji göstəricisi ilə müqayisədə 30% çoxdur.

Şirkətin baş ofisindən «APA-Economics»ə verilən məlumata görə, hesabat ilində şirkətin sığorta riskləri üzrə ödənişləri 7,7% artaraq 1,802 mln. manat təşkil edib.

Ötən il ərzində şirkətin könüllü sığorta növləri üzrə daxilolmaları 33% artaraq 6,137 mln. manata, icbari sığorta növləri üzrə isə 3,4% artaraq 556,864 min manata çatıb.

Daxilolmaların strukturunda 2,725 mln. manat (ötən illə müqayisədə 2,2% azalma olub) «Yüklərin (nəqliyyat) sığortası», 1,510 mln. manat (3,1 dəfə artıb) «Əmlakın yanğından və digər risklərdən sığortası» və 908 min manat (73% artıb) «Tibbi sığorta» növlərinin payına düşüb.

Ödənişlərdə isə könüllü sığorta növləri üzrə 1,787 mln. manat (ötən illə müqayisədə 7,4% artıb), icbari sığorta növləri üzrə isə 14,464 min manat (63% artıb) həcmində vəsait ödənilib. Ötən il sığorta hadisələri üzrə ən çox vəsait «Yüklərin (nəqliyyat) sığortası» (741,772 min manat - 26% azalıb), «Tibbi sığorta» (741,089 min manat – 3,6 dəfə artıb) və «Əmlakın yanğından və digər risklərdən sığortası» (135,487 min manat – 25% azalıb) növləri üzrə ödənilib.

Xatırladaq ki, təsisçisi «Azərbaycan Sənaye Bankı» olan «Azərbaycan Sənaye Sığorta» şirkəti 1996-cı ildən fəaliyyət göstərir. Yaxın vaxtlara kimi şirkət «Capital İnvestment Insurance» («CI Insurance») brendi ilə tanınıb. Cari il yanvarın 1-nə şirkətin nizamnamə kapitalı 6 mln. manat təşkil edib. Hazırda şirkət 22 könüllü və 4 icbari sığorta növü üzrə xidmət göstərir.