Maliyyə

Ana səhifə

Maliyyə

«PAŞA Həyat» sığorta şirkəti daxilolmaları ötən il proqnozu üstələyib

11 yanvar 2012 13:30 (UTC +04:00)

Bakı. Elnur Hüseynquluyev – APA-Economics. Azərbaycanın «PAŞA Həyat» sığorta şirkəti 2011-ci ildə daxilolmalar üzrə proqnozu 108% səviyyəsində icra edib. Belə ki, 2011-ci ildə yığımlar üzrə proqnoz 7,5 mln. manat təşkil etdiyi halda, faktiki yığım 8,1 mln. manata çatıb. Bunu «APA-Economics»ə açıqlamasında şirkətin İdarə Heyətinin sədr müavini Niyaz İsmayılov bildirib.

N.İsmayılovun sözlərinə görə, hesabat ilində sığorta hadisələri üzrə ümumilikdə 226 min manata yaxın vəsait ödənilib.

Sığorta haqlarının strukturunda təxminən 6,885 mln. manat «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası», 810 min manat «Bankdan kredit götürən şəxsin könüllü həyat sığortası», 405 min manat isə «Həyatın yaşam sığortası» növlərinin payına düşüb. Bu sığorta növlərinin məcmu sığorta haqlarındakı payı müvafiq olaraq 85%, 10% və 5% təşkil edib.

N.İsmayılov bildirib ki, ötən il ərzində sığorta hadisələrinə görə ödənilən vəsaitlərin 199,256 min manatı «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası», 25 min manatı «Həyatın yaşam sığortası», 1,7 min manatı isə «Bankdan kredit götürən şəxsin könüllü həyat sığortası» növləri üzrə ödənilib.

Qeyd edək ki, «PAŞA Həyat» sığorta şirkəti 2010-cu il noyabrın 24-də dövlət qeydiyyatına alınıb, sığorta fəaliyyətinə lisenziya (5 illik) isə bu ilin fevralın 14-də verilib. Cari il yanvarın 1-nə şirkətin nizamnamə kapitalı 7 mln. manat təşkil edib.