Maliyyə

Ana səhifə

Maliyyə

MDB ölkələrinin maliyyə nazirlikləri arasında əməkdaşlıq haqqında Anlaşma Memorandumu imzalanıb - FOTO

MDB ölkələrinin maliyyə nazirlikləri arasında əməkdaşlıq haqqında Anlaşma Memorandumu imzalanıb - <font color=red>FOTO</font>

24 may 2012 07:00 (UTC +04:00)

Bakı. Nicat Mustafayev – APA-Economics. Astanada (Qazaxıstan) Alimlərin Avrasiya İqtisadi Klubu və Qazaxıstan hökumətinin dəstəyi ilə V Astana İqtisadi Forumu keçirilib.

Azərbaycan Maliyyə Nazirliyindən «APA-Economics»ə verilən məlumata görə, «Qlobal transformasiya şəraitində dünya iqtisadiyyatının çağırışlarına və inkişaf perspektivləri»nə həsr olunan tədbir çərçivəsində əsasən dünya iqtisadiyyatının ən mühüm mövzuları, sosial-iqtisadi inkişaf, o cümlədən «Kapital və qlobal iqtisadiyyatda maliyyə», «Qlobal miqyasda davamlı inkişaf və sosial vəziyyət» mövzularında müzakirələr aparılıb. Forumda Azərbaycanı ölkənin maliyyə naziri Samir Şərifovun rəhbərlik etdiyi nümayəndə heyəti təmsil edib.

Forumun əsas plenar iclasının açılışında Qazaxıstan prezidenti Nursultan Nazarbayev, Türkiyənin baş naziri Rəcəb Tayyip Ərdoğan, tanınmış ictimai-siyasi xadimlər, alimlər və biznesmenlər iştirak edib. Tədbirə 11 Nobel mükafatı laureatı, İtaliya, Böyük Britaniya, Niderlandın sabiq baş nazirləri Romano Prodi, Toni Bleyer, Uim Kok və digər tanınmış şəxslər də qatılıb.
Forumda çıxış edən N.Nazarbayev bildirib ki, tədbirdə 90 ölkədən 8 mindən artıq nümayəndə iştirak edir. Prezident qeyd edib ki, Astana İqtisadi Forumu dünyada gedən iqtisadi proseslər, maliyyə böhranı və digər iqtisadi problemlərlə əlaqədar dialoq məkanına çevrilib. Hazırda dünyada yaşanan iqtisadi böhran və onun aradan qaldırılması istiqamətində atılan addımlar barədə danışan N.Nazarbayev qeyd edib ki, G-20 kimi formatlar daxilində aparılan müzakirələrlə iqtisadi böhranın həllinə nail olmaq çətindir. Bunun üçün daha geniş bir platformada müzakirələr aparılmalıdır. Açılışda R.T.Ərdoğan, BMT-nin baş katibinin iqtisadi və sosial məsələlər üzrə müavini Frensis Qarri, Almaniyanın sabiq prezidenti Hörst Köhler, Beynəlxalq Valyuta Fondunun sərəncamçı direktoru Min Ju, iqtisadiyyat üzrə Nobel mükafatı laureatı Robert Mandel və başqaları çıxış edib, maliyyə böhranının səbəbləri, dünya iqtisadiyyatı və maliyyə kapitalı, maliyyə böhranının aradan qaldırılmasında Forumun rolu haqqında fikirlərini bildiriblər.

Forum çərçivəsində MDB-yə üzv olan ölkələrin maliyyə nazirlərinin daimi fəaliyyət göstərən Müşavirəsinin 6-cı iclası da keçirilib. İclasda MDB-yə üzv olan ölkələrin maliyyə və iqtisadi vəziyyəti, dünyada gedən maliyyə-iqtisadi böhran və ondan çıxış yolları, bununla əlaqədar müntəzəm olaraq informasiya mübadiləsinin aparılması, maliyyə sahəsində Birlik ölkələrində inteqrasiya üzrə qarşılıqlı fəaliyyət, dünya iqtisadiyyatının sağlamlaşdırılması və inkişafının aktual məsələləri, qlobal qeyri-sabitlik fonunda maliyyə riskləri və digər məsələlər müzakirə olunub.

Müşavirədə maliyyə sahəsində avrozonada olan risklər, Yunanıstanın avrozonadan mümkün çıxışı, bunun dünya iqtisadiyyatına və dünyanın və MDB-nin maliyyə bazarına təsiri və digər məsələlər ətrafında da müzakirələr aparılıb.

Tədbirdə maliyyə nazirlikləri arasında 2012-2013-cü illər üçün əməkdaşlıq haqqında Anlaşma Memorandumunun həyata keçirilməsi üçün fəaliyyət planı təsdiq edilib.

Qeyd edək ki, MDB dövlətləri maliyyə nazirlərinin daimi fəaliyyət göstərən Müşavirəsi vəziyyəti öyrənmək və böhrana qarşı tədbirlər hazırlamaq üçün 2008-ci il oktyabrın 10-da üzv dövlətlərin hökumət başçılarının qərarı ilə yaradılıb. Qurumun ilk iclası 2008-ci il oktyabrın 21-də keçirilib.