Maliyyə

Ana səhifə

Maliyyə

Brüsseldə Azərbaycanın “Green Card” sisteminə qoşulmasına dair görüş keçirilib

25 may 2012 09:38 (UTC +04:00)

Bakı. Elnur Hüseynquluyev - APA-Economics. Brüsseldə (Belçika) Azərbaycan Maliyyə Nazirliyinin Dövlət Sığorta Nəzarəti Xidmətinin rəisi Namiq Xəlilovla Milli Avtonəqliyyat Sığortası Bürolarının Beynəlxalq Assosiasiyasının («Green Card») Bürolar Şurasının prezidenti Mariusz Viçtovski arasında görüş keçirilib.

İcbari Sığorta Bürosundan «APA-Economics»ə verilən məlumata görə, görüş zamanı Azərbaycanın «Green Card» sisteminə daxil olması prosesinə başlanması, həmçinin sistemə daxil olma proseduraları müzakirə edib, müvafiq tövsiyələr verilib.

Qeyd edək ki, «Green Card» sistemi 1953-cü ilin yanvarın 1-dən tətbiq olunub. «Green Card» sistemi «Avtonəqliyyat vasitəsi sahiblərinin mülki məsuliyyətinin sığortası» şəhadətnaməsinin bu sistemin iştirakçıları, yəni üzv ölkələr arasında qarşılıqlı tanınması haqqında sazişdir. Bu sistemə əsasən «Green Card» haqqında sazişin iştirakçıları olan dövlətlərin hər hansı biri tərəfindən verilmiş avtonəqliyyat vasitəsi sahiblərinin mülki məsuliyyətinin sığorta şəhadətnaməsi həmin sazişin iştirakçısı olan digər dövlətlərin ərazisində etibarlı sayılır.

Hazırda bu sistemə Avropa, Asiya və Afrikadan 46 ölkə, həmçinin Rusiya, Türkiyə və İran daxildir.