Maliyyə

Ana səhifə

Maliyyə

Azərbaycanda pul kütləsi 33% artıb

29 may 2012 14:14 (UTC +04:00)

Bakı. Vahab Rzayev – APA-Economics. Azərbaycanda geniş mənada pul kütləsinin (M3 aqreqatı) həcmi 2012-ci il aprelin 1-nə 14 319,9 mln. manat təşkil edib ki, bu da ötən ilin müvafiq dövrü ilə müqayisədə 3 562,5 mln. manat və ya 33,1% çoxdur.

Azərbaycan Mərkəzi Bankından «APA-Economics»ə verilən məlumata görə, yanvar-mart aylarında geniş mənada pul kütləsi 416,7 mln. manat və ya 3% artıb.

Qeyd edək ki, M3 aqreqatının strukturuna banklardan kənarda nağd pullar, tələb olunanadək və müddətli əmanət və depozitlər daxildir.

Pul kütləsinin M2 aqreqatı (manat pul kütləsi) yanvar-mart aylarında 266,2 mln. manat və ya 2,4% artaraq 11 263,4 mln. manata çatıb:

(mln. AZN)

	01.04.2011	01.01.2012	01.04.2012
M0 (nağd pullar)	5 427,1	7 158,2	7 241,3
M1 (nağd pul, tələb olunanadək əmanət və depozitlər)	6 608,5	8 824,8	8 996,9
M2 (nağd pul, tələb olunanadək və manatla müddətli əmanət və depozitlər)	8 115,5	10 997,2	11 263,4
M3 (nağd pul, tələb olunanadək və müddətli əmanət və depozitlər)	10 757,4	13 903,2	14 319,9

Pul bazarında nağdlaşdırma səviyyəsinə gəldikdə isə qeyd olunmalıdır ki, cari ilin aprelin 1-nə nağd pulun manat pul kütləsində xüsusi çəkisi 64,3% təşkil edib. Bu isə ötən ilin müvafiq dövrünün göstəricisindən 2,6 faiz bəndi azdır.

Qeyd edək ki, nağdlaşdırma səviyyəsinin azalması ölkədə nağdsız hesablaşmaların genişlənməsini əks etdirir.