Maliyyə

Ana səhifə

Maliyyə

Azərbaycan sığorta bazarı son bir ildə 73% artıb

17 avqust 2012 08:07 (UTC +04:00)

Bakı. Elnur Hüseynquluyev – APA-Economics. Cari ilin yanvar-iyul aylarında Azərbaycanda fəaliyyət göstərən sığorta təşkilatları tərəfindən toplanan sığorta haqlarının ümumi həcmi 201,509 mln. manat təşkil edib ki, bu da ötən ilin müvafiq dövrünün göstəricisi ilə müqayisədə 73% çoxdur.

Maliyyə Nazirliyindən «APA-Economics»ə verilən məlumata görə, hesabat dövründə sığorta hadisələri üzrə ödənişlərin ümumi həcmi 52% artaraq 49,469 mln. manata çatıb.

Bu müddət ərzində həyat sığortası üzrə daxilolmaların həcmi 5,6 dəfə artaraq 8,484 mln. manat, qeyri-həyat sığortası üzrə sığorta haqları 51% artaraq 118,454 mln. manat, icbari sığorta növləri üzrə isə təxminən 2 dəfə artaraq 74,572 mln. manat olub.

Ödənişlərə gəldikdə isə həyat sığortası üzrə ödənilən vəsaitlərin həcmi 8 dəfə artaraq 1,113 mln. manata, qeyri-həyat sığortası üzrə ayrılan vəsaitlər 49% artaraq 39,971 mln. manat, icbari sığorta növləri üzrə isə 48% artaraq 8,385 mln. manata çatıb.

Bundan başqa, daxilolmaların strukturunda ən çox sığorta haqqı «Tibbi sığorta» (42,189 mln. manat), «Avtonəqliyyat vasitəsi sahiblərinin mülki məsuliyyətinin icbari sığortası» (41,095 mln. manat), «Avtonəqliyyat vasitələrinin sığortası» (31,701 mln. manat), «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta» (17,270 mln. manat), «Əmlakın yanğından və digər risklərdən sığortası» (15,358 mln. manat) və «Yüklərin sığortası» (9,227 mln. manat) növləri üzrə toplanıb. Bu növlərin məcmu sığorta haqlarında bazar payı müvafiq olaraq 21%, 20%, 16%, 9%, 8% və 5% təşkil edib.

Ödənişlərdə isə ən çox vəsait «Tibbi sığorta» (21,436 mln. manat və ya 43%), «Avtonəqliyyat vasitələrinin sığortası» (12,467 mln. manat və ya 25%), «Hərbi qulluqçuların dövlət icbari şəxsi sığortası» (4,426 mln. manat və ya 8,9%) və «Avtovəqliyyat vasitəsi sahiblərinin mülki məsuliyyətinin icbari sığortası» (1,729 mln. manat və ya 3,5%) növləri üzrə ödənilib.

Qeyd edək ki, Azərbaycanda 28 sığorta təşkilatı fəaliyyət göstərir.