Maliyyə

Ana səhifə

Maliyyə

“PAŞA Həyat” Azərbaycan Universitetində Master Klass keçirib

04 aprel 2014 15:38 (UTC +04:00)

Bakı. APA-Economics. “PAŞA Həyat Sığorta” ASC tərəfindən bu ilin aprel ayının 2 və 3-də Azərbaycan Universitetində keçirilmiş Master Klass təlimi başa çatıb.

Şirkətdən “APA-Economics”ə verilən məlumata görə, “Sığorta və sığorta mədəniyyəti” mövzusunda keçirilən təlimin açılışında iştirak edən Azərbaycan Universitetinin rektoru Eldar Qəhrəmanov “PAŞA Həyat Sığorta” ASC tərəfindən tələbələrlə bağlı həyata keçirilən maarifləndirmə işlərini yüksək qiymətləndirib: “Bu təlim tələbələri daha dəqiq istiqamətlərə yönəltməklə əmək bazarına ilk addımlarını atan gənclərə böyük dəstək ola bilər. Azərbaycan Universitetinin tələbələri təhsil aldıqları dövrdə universitetin tərəfdaşları ilə sıx əlaqələrindən faydalanaraq karyeralarını daha uğurlu qurmaq imkanı əldə edirlər. Master Klassın bizim Universitetdə təşkil edilməsini “PAŞA Həyat”-la Azərbaycan Universiteti arasında böyük bir əməkdaşlığın başlanğıcı kimi qiymətləndirirəm. Ümidvaram ki, bundan sonra da “PAŞA Həyat”la əməkdaşlığımız uğulu və davamlı olacaq”, – deyə rektor qeyd edib.

Açılışda şirkətin strateji inkişaf üzrə direktoru İsrail Qarayev də çıxış edib. Azərbaycan sığorta bazarının mövcud inkişaf tendensiyasından, dövlətin sığorta sektoruna olan diqqət və qayğısından danışan İ. Qarayev bu sahədə aparılan islahatların uğurlu və məqsədə uyğun olduğunu bildirib.

İ. Qarayev daha sonra şirkətin tələbələrlə bağlı həyata keçirilən maarifləndirmə layihəsi barədə məlumat verib. O qeyd edib ki, layihənin icrasına 2013-cü ilin iyul ayından start verilib və həmin vaxtdan indiyədək 150-dən çox tələbə şirkətin təşkil etdiyi təlimlərdə iştirak edib. Layihədə əsas məqsəd tələbələrin sığortaya, o cümlədən həyat sığortası sahəsinə olan maraqlarını, həmçinin bilik, bacarıq və qabiliyyətlərini artırmaqdır.

Qeyd edək ki, təlimdə tələbələrə sığorta haqqında ümumi məlumatlar, sığortanın hüquqi bazası, sığorta mədəniyyəti, sığorta müqavilələrinin hazırlanması, sığortaçının hüquq və öhdəlikləri, sığorta sektoru, Azərbaycan və xarici sığorta bazarlarının inkişaf istiqamətləri və mövcud vəziyyəti haqqında ətraflı məlumat verilib. Təliminin sonunda tələbələrə müvafiq sertifikatlar təqdim olunub və xatirə şəkilləri çəkilib.