Bakı. Vahab Rzayev – APA-Economics. Bu ilin I rübündə Azərbaycanda məzənnə siyasəti valyuta bazarında tələb ilə təklif arasında tarazlığın təmin olunmasına və bu əsasda manatın ABŞ dollarına qarşı məzənnəsinin sabitliyinə yönəldilib. «APA-Economics»in xəbər verdiyi kimi, bu barədə Azərbaycan Mərkəzi Bankının (AMB) I rüb üzrə hazırladığı «Pul siyasəti İcmalı»nda deyilir.
İcmalda göstərilir ki, məzənnə siyasətinin parametrləri tədiyyə balansının vəziyyəti, bank sektorunda maliyyə sabitliyi və qeyri-neft sektorunun rəqabət qabiliyyətinin qorunması hədəfləri nəzərə alınmaqla müəyyənləşdirilib.
Hesabat dövründə də Mərkəzi Bank özünün məzənnə siyasətini dəhliz daxilində dollar/manat ikitərəfli məzənnəsinin hədəflənməsi çərçivəsində həyata keçirib. Ölkənin tədiyyə balansında böyük profisitin mövcud olması şəraitində valyuta bazarında təklif tələbi üstələyib. Lakin məzənnənin əhəmiyyətli möhkəmlənməsinin qarşısını almaq və bununla da qeyri-neft sektorunun rəqabət qabiliyyətinə neqativ təsirləri neytrallaşdırmaq üçün AMB tərəfindən rüb ərzində 844,7 mln. dollar həcmində valyuta sterilizasiyası həyata keçirilib.
Son 5 ilin ilk rübləri üzrə manatın dollara qarşı məzənnəsinin orta bahalaşma göstəricisi 0,4% təşkil etsə də, dövr ərzində məzənnə demək olar ki, dəyişməyib. «Milli valyutanın məzənnəsinin sabitliyi ölkədə makroiqtisadi mühitə və maliyyə sektorunun sabitliyinə müsbət təsir göstərib», - deyə hesabatda qeyd olunub.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
