MDB

Ana səhifə

MDB

Nino Burcanadzenin lideri olduğu partiyanın iqtisadi proqramının təqdimatı keçirilib

26 noyabr 2009 15:05 (UTC +04:00)

Tiflis. Nizami Məmmədzadə-APA. Bu gün Tiflisin “Kortyard Mariott” mehmanxanasında Nino Burcanadzenin rəhbərlik etdiyi “Demokratik hərəkat-Vahid Gürcüstan” partiyası tərəfindən hazırlanmış iqtisadi proqramın təqdimat mərasimi keçirilib. APA-nın Gürcüstan bürosunun məlumatına görə, tədbiri partiyanın sədri Nino Burcanadze açıb. O qeyd edib ki, bu proqram ölkə inkişafında iqtisadiyyatın istiqamətinin hərəkətini özündə birləşdirir. Sənəddə həmçinin büdcə, vergi, maarif, aqrar və başqa sahələrdə mövcud iqtisadi çatışmazlıqlar da qeyd olunub.

APA-nın Gürcüstan bürosuna açıqlama verən Nino Burcanadze qeyd edib ki, hazırlanan proqramda Gürcüstanda hazırda həyata keçirilən iqtisadiyyatın problemləri öz əksini tapıb: “Müasir şəraitdə ölkəmizdə istehsalla ixracat və istifadə etmək prinsipləri bir-biri ilə uzlaşmır. Bu, bizim üçün minusdur. Biz buna görədə təqdimatını keçirdiyimiz iqtisadi proqramda büdcə, iqtisadiyyat və digər sahələrdə real addımları qeyd edərək ölkəmizin böhrandan çıxmaq yollarını iqtisadi analizlərlə və faktlarla göstərmişik. Proqramda ilk növbədə iqtisadi inkişafımız üçün sərfəli olan ayrı-ayrı kompenentləri qeyd etmişik. İndi bizə dövlətin strateqiyasını və inkişafını özündə əks etdirən uzunmüddətli inkişaf planı və situasiyanın analizi lazımdır. Biz proqramda Gürcüstanın iqtisadiyyatını Azərbaycan, Ermənistan və Baltikyanı respublikalarının iqtisadiyyatı ilə müzakirə etmişik. Elə komponentlər var ki, biz çox geridə qalmışıq, lakin bəzi komponentlərdə isə irəlidəyik”. Tədbirə ekspertlər, Gürcüstanda akkreditə olunmuş xarici diplomatlar, siyasi partiyaların və qeyri-hökumət sektorunun nümayəndələri və jurnalistlər iştirak edib. Xatırladaq ki, Nino Burcanadzenin partiyası bundan əvvəl təhlükəsizlik konsepsiyası və sosial siyasət proqramının təqdimatını həyata keçirib.