MDB

Ana səhifə

MDB

Permdə gecə klubunda baş vermiş yanğında ölənlərin sayı 112-yə çatıb

05 dekabr 2009 10:53 (UTC +04:00)

Onların əksəriyyəti dəm qazından zəhərlənərək və yaranmış basabasda aldıqları xəsarətlərdən ölüb. Hazırda xəstəxanalarda hadisə nəticəsində müxtəlif xəsarətlər almış 130 nəfər var. Faciənin terror aktı nəticəsində baş verdiyini təsdiqləyən heç bir dəlil yoxdur.

Yaralıların əksəriyyətinə dəm qazında zəhərlənmə və yanıq diaqnozu qoyulub. Vəziyyəti daha ağır olan 10 nəfərin Moskvaya göndərilməsi planlaşdırılır.

Moskvadan təyyarə ilə Permdə dərman preparatları və sarğı materialları göndərilib. Bundan başqa, Moskvadan Permə 12 həkim də köməyə gedib.

Qeyd edək ki, dekabrın 4-dən 5-nə keçən gecə Moskva vaxtı ilə saat 23.15-də (Bakı vaxtı ilə saat 00.15) Rusiyanın Perm şəhəri, Kuybışev keçəsi, ev 9 ünvanında yerləşən “Xromaya loşad” (“Axsaq at”) gecə klubunda yanğınla müşayiət olunan partlayış baş verib. İlkin versiyaya görə, partlayışa pirotexnika ilə ehtiyatsız davranma səbəb olub. Lakin hadisənin baş vermə səbəbi ilə bağlı daha bir versiya irəli sürülüb. İkinci versiyaya görə, hadisəyə rəqs meydanının üzərində tavandan asılmış iri lampanın naqilinin qırılması səbəb olub.

Faktla bağlı Rusiya Cinayət Məcəlləsinin yanğın təhlükəsizliyi qaydalarının pozulması maddəsi üzrə cinayət işi başlanıb. Rusiyanın baş prokuroru Yuri Çayka istintaqı nəzarətinə götürüb.

Fövqəladə hallar naziri Sergey Şoyqu, daxili işlər naziri Rəşid Nurqaliyev və səhiyyə və sosial inkişaf naziri Tatyana Qolikov hadisə yerində olub.

Nazirlər baş verən hadisə ilə əlaqədar yaradılmış dövlət komissiyasının tərkibinə daxildirlər. Rusiya prezidentinin yaratdığı komissiyaya S. Şoyqu rəhbərlik edir.

Hadisəyə görə artıq iki nəfər saxlanıb. Bunlar klubun həmtəsisçisi Anatoli Zek və klubun icraçı direktoru Svetlana Yefremovadır. Lakin A. Zek dindirmədə bildirib ki, baş vermiş hadisəyə heç bir aidiyyəti yoxdur, çünki klubu icarəyə verib.

Onlar Rusiya Cinayət Məcəlləsinin 219.2 (iki və daha artıq şəxsin ölümü ilə nəticələnən yanğın təhlükəsizliyi qaydalarının pozulması) maddəsi təqsirli bilinirlər.

Hadisədə günahı olan digər şəxslərin saxlanması üçün lazımi tədbirlər görülür.

Onu da əlavə edək ki, saxlanılanlardan biri A. Zak Permin 100 varlı şəxsinin siyahısında daxildir. “Xromaya loşad” klubundan başqa, onun inşaat materialları mağazaları şəbəkəsi və bir neçə daşınmaz əmlak kommersiya obyekti var.

Perm