MDB

Ana səhifə

MDB

Bakiyevin qardaşını həbs etmək üçün Cəlalabada gələn Qırğızıstanın daxili işlər naziri milislər tərəfindən daşa basılıb

17 aprel 2010 11:52 (UTC +04:00)

APA-nın məlumatına görə, sübh tezdən milis və 70 nəfərlik xüsusi təyinatlı dəstə Bakiyevlərin ata yurdu olan Teyit kəndindəki evini mühasirəyə alıb.

Qırğızıstan müvəqqəti hökumətin baş nazirinin müavini Azimbek Beknazarov jurnalistlərə açıqlamasında bildirib ki, sabiq prezidentin qardaşının saxlanılması ilə bağlı xüsusi əməliyyata daxili işlər naziri səlahiyyətlərini icra edən Bolotbek Şerniyazov başçılıq edir. Onun sözlərinə görə, Janıbek Bakiyev mühasirəyə alınsa da, təslim olmaq istəmir: “Evdə qadın və uşaqlar olduğu üçün milis hücuma keçmir”.

Mühasirəyə alınmış evdə olan Bakiyev tərəfdarlarından biri isə “RİA Novosti”yə evdə silahsız dörd nəfər olduqlarını, Janıbek Bakiyevin isə onlarla olmadığını söyləyib. Günorta saatlarında Janıbek Bakiyevin evdə olmadığı dəqiqləşib və əməliyyat təxirə salınıb. Yalnız Bakiyevlərin evdə olan qohumlarından biri həbs olunub.

Qeyd edək ki, Janıbek Bakiyev Qırğızıstan Dövlət Mühafizə Xidmətinin rəhbəri olub. Ölkənin yeni hakimiyyəti onu aprelin 7-də Bişkekin mərkəzində - hökumət binasına hücum edən nümayişçiləri güllələməyə əmr verməkdə ittiham edir. Janıbek Bakiyevə qarşı “kütləvi qətl törətmə” maddəsi ilə cinayət işi qaldırılıb.

Maraqlıdır ki, əməliyyatın davam etdiyi vaxtlarda Cəlalabad şəhərinin mərkəzində yerli milis işçilərinin mitinqi başlayıb. APA-nın Fergana.ru-ya istinadən məlumatına görə, daxili işlər orqanlarına Bolotbek Şerniyazovun başçılıq etməsinə qarşı çıxan milislər 6-7 aprel hadisələri zamanı həlak olan həmkarlarının dövlət rəsmiləri səviyyəsində anılmamasını da pisləyiblər: “Sabah bizimlə də bu cür davranılmayacağına heç bir təminat yoxdur”.

Mitinqçilərin tələbi ilə Bolotbek Şerniyazov onların qarşısına çıxıb. Nazir əvəzi ilə milislərin danışıqları əvvəlcə sakit tonda keçsə də, qəfildən bir neçə nəfər onun üzərinə hücum ediblər. Mühafizəçilərinin köməyi ilə avtomobilinə minən Şerniyazovun korteji daş və butılka atəşinə də məruz qalıb.