MDB

Ana səhifə

MDB

Ukraynada vəziyyət gərginləşir, “narıncı”lar Yanukoviçə qarşı birləşir, parlamentin növbədənkənar iclası çağırılır

22 aprel 2010 07:58 (UTC +04:00)

APA-nın “Ukrainskaya pravda”ya istinadən verdiyi məlumata görə, “Yuliya Timoşenko” bloku aprelin 24-də bu məsələ ilə bağlı Ali Radanın növbədənkənar sessiyasının keçirilməsi təklifi ilə çıxış edib. Y. Timoşenko müxalifətçi millət vəkillərini bu tələblə imza toplamağa çağırıb: “Mən əminəm ki, bu cür hadisələr bütün müxalif qüvvələri, eləcə də ölkənin dağılmağa doğru getdiyini başa düşən deputatları birləşdirməlidir”.

Y. Timoşenko V. Yanukoviçin Rusiyanın Qara dəniz donanmasının Ukraynada qalma müddətinin uzadılmasına dair imzaladığı sənədin etibarsız sayılması haqqında qərar layihəsi hazırlayacaqlarını açıqlayıb: “Yanukoviçin özbaşına addımı göstərir ki, Ukraynada prezident yoxdur. Bu adam ədalətsiz şəkildə bu postda oturub və öz imicini təmizə çıxarmaq, başqa dövlətlərin dəstəyini qazanmaq üçün Konstitusiyaya zidd addımlar ataraq Ukraynanın milli maraqlarını məhv edir”.

Sabiq baş nazir adi vətəndaşları da şənbə günü Ali Radanın qarşısına gələrək öz etirazlarını ifadə etməyə səsləyib.

“Bizim Ukrayna-Xalq Özünümüdafiəsi” blokundan Y. Timoşenkonun təşəbbüsünə dəstək gəlib. Blok parlamentin növbədənkənar sessiyasında iştirak edəcəyini açıqlayıb. Blokun lideri Nikolay Martınenko bildirib ki, onlar V. Yanukoviçin Ali Rada qarşısında şəxsən hesabat verməsini tələb edəcəklər. Onun sözlərinə görə, Ukrayna və Rusiya prezidentlərinin imzaladığı sənəd kobud Konstitusiya pozuntusu olmaqla birlikdə Ukraynanın parçalanmasına təkan verən bir addımdır: “Ukrayna ərazisində xarici hərbi bazanın olması ölkənin milli təhlükəsizliyinə təhdiddir və Ukraynanın Avropaya inteqrasiyasının üstündən xətt çəkir”.

Blokun üzvü, “Ukrayna uğrunda” Partiyasının lideri Vyaçeslav Kirilenko da müxalifəti birliyə və Rusiyanın Qara dəniz donanmasının ölkədə qalma müddətinin uzadılması barədə sazişin parlamentdə ratifikasiyasına imkan verməməyə çağırıb.

Yanukoviç_Medvedev