MDB

Ana səhifə

MDB

Tiflisdə «SOCAR»-a məxsus YDM-də saxta talonlarla benzin dolduran ermənilərdən ibarət mütəşəkkil cinayətkar qrup tutulub

30 aprel 2010 20:17 (UTC +04:00)

Tiflis. Nizami Məmmədzadə-APA. Tiflisdə fəaliyyət göstərən ARDNŞ-in Gürcüstan nümayəndəliyinə məxsus iki yanacaqdoldurma məntəqələrinə saxta benzin doldurma barədə məlumat daxil olub. APA-nın Gürcüstan bürosunun məlumatına görə, bu barədə ARDNŞ-ın rəsmisi məlumat verib.

Onun məlumatına görə, «SOCAR»-a məxsus yanacaqdoldurma məntəqəsinin əməkdaşları Gürcüstan vətəndaşı Vitali Qulisaryana məxsus VAZ-2107 markalı ADV-461 seriyalı avtomobilə 50 litr benzin doldurub: «Sonra məlum olub ki, onun məntəqəyə təqdim etdiyi talonlar saxtadır. O, yenə əlavə 50 litr benzin doldurmaq istəyəndə ondan şübhələnən məntəqə əməkdaşları hüquq-mühafizə orqanlarına məlumat veriblər. Qeyd olunan faktla bağlı Gürcüstan hüquq-mühafizə orqanları təcili tədbirlər həyata keçirib. Nəticədə erməni millətindən olan Gürcüstan vətəndaşları Vitali Qulisaryan və onun dostu Alik Qulisaryan saxlanılıb. Hüquq-mühafizə orqanları tərəfindən onların Tiflis şəhərində yaşadıqları evlərdə «SOCAR»-ın talonlarına bənzər küllü miqdarda «10», «20», və «50» litrlik saxta talonlar və saxta pul (lari) əsginasları tapılıb. Həmin evlərdən eyni zamanda bir neçə texniki avadanlıq və kompüter aparatları aşkar edilərək götürülüb. Cinayətin açılmasına görə, Gürcüstan Daxili İşlər Nazirliyi ARDNŞ rəhbərliyinə təşəkkür edib».

ARDNŞ rəsmisi APA-ya bildirib ki, cinayət törədən şəxslərin üstündən odlu silah da tapılıb. «Bu «SOCAR»-a qarşı iqtisadi təxribatdır», deyə ARDNŞ rəsmisi bildirib.

APA-nın məlumatına görə, hüquq-mühafizə orqanları əlavə axtarışları gücləndiriblər. Qrupun digər üzvlərini aşkar etmək və saxlamaq üçün hüquq-mühafizə əməkdaşları tərəfindən əlavə axtarış tədbirləri həyata keçirilir.