Rusiya Federal Təhlükəsizlik Xidməti (FSB) ABŞ-dan Moskvada terror aktı hazırlığı ilə bağlı daxil olan məlumatları yoxlayarkən “Tsaritsıno” parkında cinayət törətmək niyyətində olduğunu bildirən təhdid xarakterli videonu “TikTok”da paylaşan yeniyetməni saxlayıb.
APA xəbər verir ki, bu barədə FTX-nin İctimaiyyətlə Əlaqələr Mərkəzi məlumat yayıb.
“Federal Təhlükəsizlik Xidməti Rusiya Milli Qvardiyası, Daxili İşlər Nazirliyi və İstintaq Komitəsi ilə birgə ABŞ hüquq-mühafizə orqanlarından Moskvada “Tsaritsıno” Dövlət Tarix-Memarlıq və Təbiət-Landşaft Muzey-Qoruğunun ərazisində terror aktı hazırlanması ilə bağlı daxil olan məlumatı yoxlayıb. Həyata keçirilən tədbirlər nəticəsində “TikTok” qısa video paylaşım platformasında taktiki geyimdə, kepkada, eynək və qulaqlıqda, avtomatik silaha bənzər əşya ilə çəkilmiş fotolarını, eləcə də “Tsaritsıno” muzey-qoruğunun ərazisində çəkdirdiyi və üzərində “I found a place” (ingilis dilindən tərcümədə “Mən bir yer tapdım”) yazısı olan şəkilləri paylaşan Rusiya vətəndaşı, yetkinlik yaşına çatmayan şəxs saxlanılıb”, – deyə FSB-dən bildirilib.
***
saat 00.16
ABŞ-ın Rusiyadakı səfirliyinin terror təhlükəsi ilə bağlı xəbərdarlığından sonra Moskvadakı “Tsaritsıno” muzey-qoruğu bağlanıb.
APA-nın Moskva bürosunun Rusiya mətbuatına istinadən verdiyi məlumata görə, əraziyə hüquq-mühafizə orqanlarının əməkdaşları cəlb edilib.
Bildirilib ki, muzey-qoruğa aparan bütün yollar bağlanıb. Qoruğun ən azı iki gün ərzində ziyarətçilər üçün bağlı qalacağı qeyd olunub.
Rusiya Teleqram kanallarının məlumatına görə, əraziyə 50 çevik polis əməkdaşı, Rusiya Milli Qvardiyasının hərbçiləri, yanğınsöndürənlər və partlayıcı qurğuların zərərsizləşdirilməsi üzrə mütəxəssislər göndərilib.
Yol polisi əməkdaşları isə muzey-qoruğun ətrafında hərəkət edən nəqliyyat vasitələrini yoxlayırlar.
Xatırladaq ki, ABŞ səfirliyi daha əvvəl oktyabrın 31-də “Tsaritsıno” muzey-qoruğunun ərazisində insan tələfatına səbəb ola biləcək hadisə təhlükəsi barədə xəbərdarlıq yayıb.
Rusiya Federal Təhlükəsizlik Xidməti (FTX) ABŞ tərəfindən Moskvada terror aktının hazırlanması barədə məlumat aldığını və bununla bağlı müvafiq tədbirlər həyata keçirildiyini təsdiqləyib.
***
19:14
Rusiya Federal Təhlükəsizlik Xidməti (FSB) ABŞ-dan tərəfdaş kanallar vasitəsilə Moskvada terror aktının planlaşdırılması barədə məlumat alıb.
APA-nın Moskva bürosu xəbər verir ki, bu barədə FSB-nin mətbuat xidməti məlumat yayıb.
Bildirilib ki, hazırda Rusiya xüsusi xidmət orqanları müvafiq tədbirlər görür.
Qeyd edək ki, bu gün ABŞ-ın Rusiyadakı səfirliyi Tsaritsyno Muzey-Qoruğunun ərazisində "kütləvi itkilər"lə bağlı "etibarlı təhlükə" barədə xəbərdarlıq yayıb. Səfirlik diplomatların "Tsaritsino" Muzey-Qoruğunda kütləvi insan tələfatına səbəb ola biləcək təhlükə barədə məlumat əldə etdiyini açıqlayıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
