Mədəniyyət siyasəti

Ana səhifə

Mədəniyyət siyasəti

YUNESKO-da Azərbaycan Günü çərçivəsində müxtəlif tədbirlər keçirilib

20 noyabr 2009 08:20 (UTC +04:00)

Bakı. Ülkər Qasımova-APA. YUNESKO-da Azərbaycan Günü çərçivəsində “Azərbaycan qadını: dünən, bu gün və sabah” elmi konfransı, görkəmli alim Musa Əliyevin həyat və yaradıcılığına həsr olunmuş simpozium və dahi rəssam Səttar Bəhlulzadənin 100 illik yubileyinə həsr olunmuş sərgi keçirilib. Tədbirlərdə iştirak edən Mədəniyyət və Turizm Nazirliyinin mətbuat katibi Zöhrə Əliyeva APA-ya bildirib ki, mərasimdə iştirak etmək üçün Parisə gələn Azərbaycanın baş nazirinin müavini, xalq yazıçısı Elçin Əfəndiyevin rəhbərlik etdiyi nümayəndə heyətinin tərkibinə mədəniyyət və turizm naziri Əbülfəs Qarayev, xarici işlər nazirinin müavini, Azərbaycan Diplomatik Akademiyasının rektoru Hafiz Paşayev, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Milli Elmlər Akademiyasının vitse-prezidenti Akif Əlizadə, tanınmış elm və mədəniyyət xadimləri daxil olub. Tədbirlər Azərbaycan diplomatiyasının 90 illiyinə həsr olunmuş “Azərbaycan qadını: dünən, bu gün və sabah” adlı konfransla başlayıb. Konfransı Azərbaycanın YUNESKO yanındakı daimi nümayəndəsi, səfir Eleonora Hüseynova açaraq “Azərbaycan günü” ilə bağlı tədbirlərdən danışıb, belə bir günün YUNESKO-da keçirilməsinin mühüm hadisə olduğunu vurğulayıb.
Nümayəndə heyətinin rəhbəri, baş nazirin müavini Elçin Əfəndiyev isə YUNESKO-da Azərbaycan Gününün keçirilməsini ölkəmiz üçün tarixi bir hadisə olduğunu qeyd edib. . Azərbaycan Diplomatik Akademiyasının rektoru Hafiz Paşayev Azərbaycan diplomatiyası tarixinin 1918-ci ildə Şərqdə ilk demokratik hakimiyyət qurmuş Azərbaycan Xalq Cümhuriyyətinin yarandığı vaxta təsadüf etdiyini, bu dövlətin cəmi 23 ay yaşadığını, qısa bir vaxtda fəaliyyət göstərməsinə baxmayaraq, Azərbaycan diplomatiyasının yaranmasında xüsusi rola malik olduğunu bildirib.
YUNESKO baş direktorunun müavini Hans Orvill YUNESKO-da Azərbaycan Günü keçirilməsini qurumla Azərbaycan arasında sıx əlaqələrin olmasına dəlalət etdiyini diqqətə çatdırıb. Fransa Strateji və Diplomatik Araşdırmalar Mərkəzinin fəxri sədri, beynəlxalq məsləhətçi Jan-İv Şevalye, “Yol” jurnalının redaktoru, sənətşünas alim Lalə Kazımova, arxeologiya elmləri doktoru xanım Berti Lionnet, filologiya elmləri doktoru, Beynəlxalq Diplomatiya Akademiyasının müəllimi Şirin Melikof və AMEA-nın müxbir üzvü, kimyaçı alim, institut direktoru Elmira Ramazanova Azərbaycan qadınının ədəbiyyat və diplomatiya, incəsənət və elm sahələrindəki fəaliyyətlərindən, Şərqdə və Avropada ilk dəfə olaraq 1918-ci ildə azərbaycanlı qadınlara seçmək və seçilmək hüququnun verilməsindən söz açıblar.
Azərbaycan Günü çərçivəsində dünya şöhrətli alim, ölkəmizdə geologiya elminin inkişafında xüsusi xidmətləri olmuş, Azərbaycan Milli Elmlər Akademiyasının ilk prezidentlərindən biri Musa Əliyevin anadan olmasının 100 illiyinə həsr edilmiş simpozium da keçirilib. Baş nazirin müavini Elçin Əfəndiyev simpoziumda çıxış edərək Musa Əliyev kimi görkəmli alimin 100 illiyinin YUNESKO-da qeyd edilməsinin ölkəmiz üçün mühüm əhəmiyyət daşıdığını söyləyib. YUNESKO-nun baş direktorunun təbii və dəqiq elmlər üzrə müavini M. Erdelen belə bir tədbirdə iştirakın onun üçün böyük şərəf olduğunu qeyd edib. Fransanın “Total” şirkətinin təmsilçisi Katrin Qrasse neft sənayesinin inkişafında xüsusi xidmətləri olmuş Musa Əliyevin ənənələrinin bu gün də yaşadığını söyləyib və “Total” şirkətinin Azərbaycandakı fəaliyyəti barədə məlumat verib. Akademik Musa Əliyevin nəvəsi Cəmilə Paşayeva babaları - Mir Cəlal Paşayevin və Musa Əliyevin yubileylərinin YUNESKO-da qeyd edilməsindən məmnunluq hissi keçirdiyini söyləyib.
Azərbaycan Günü çərçivəsində YUNESKO-nun “Segük” sərgi salonunda dahi Azərbaycan rəssamı Səttar Bəhlulzadənin 100 illiyinə həsr olunmuş sərgi isə bütün toplaşanlar tərəfindən həmin gün baş verən hadisələrin məntiqi sonlugu kimi dəyərləndirilib. Sərginin açılışında baş nazirin müavini Elçin Əfəndiyev, mədəniyyət və turizm naziri Əbülfəs Qarayev dünya boyakarlıq sənətində Səttar Bəhlulzadənin xüsusi yeri olduğunu, ölkəmizin müxtəlif bölgələrini qarış-qarış gəzmiş rəssamın təbiət mənzərələrini ölməz əsərlərində əks etdirdiyini, yaratdığı tablolarda tamaşaçıya Vətənə məhəbbət hissi aşıladığını, sadə həyat tərzi keçirmiş bu insanın dünya şöhrətli əsərlər yaratdığını, mərhum dövlət başçısı Heydər Əliyevin Səttar Bəhlulzadə yaradıcılığına xüsusi önəm verdiyini bildiriblər. Dünyanın müxtəlif ölkələrindən gəlmiş tədbir iştirakçıları arasında alimlər, diaspora nümayəndələri ilə yanaşı Azərbaycanın böyük dostu, görkəmli yazıçı Oljas Süleymenov da olub. Tamaşaçılar Səttar Bəhlulzadənin bir neçə orijinal əsəri və 80-ə yaxın fotoreproduksiyasını böyük maraqla seyr ediblər. Ekspozisiyada sərgilənən əsərlərin kiçik formatda hazırlanmış fotoreproduksiyaları qonaqlara hədiyyə olunub.