Mədəniyyət siyasəti

Ana səhifə

Mədəniyyət siyasəti

Londonda Azərbaycan Mədəniyyəti Günləri keçirilib

24 noyabr 2009 10:38 (UTC +04:00)

Bakı. Ülkər Qasımova - APA. Noyabrın 21-22-də Avropa Azərbaycan Cəmiyyətinin təşkilatçılığı ilə Londonda Kadoqan sarayında Azərbaycan Mədəniyyət Günləri keçirilib. APA-nın məlumatına görə, formatına görə Britaniya paytaxtında ilk dəfə keçirilən tədbirin əsas məqsədi zəngin Azərbaycan mədəniyyətini, onun turizm potensialını tanıtmaq olub. Mədəniyyət günləri çərçivəsində təşkil olunmuş Azərbaycan musiqisinin müxtəlif janrlarından ibarət konsertlər və sərgilər londonlular tərəfindən böyük maraqla qarşılanıb.

Tədbirlərin ilk günündə Azərbaycan Dövlət Rəqs Ansamblı, “Bakustick Jazz!” qrupunun, eləcə də tanınmış muğam ifaçıları, Azərbaycanın xalq artistləri Mənsum İbrahimov, Aygün Bayramova və birinci televiziya muğam müsabiqəsinin qalibi Elməddin İbrahimovun iştirakı ilə qala konsert keçirilib. Qonaqlar Azərbaycanın xalq artisti Afaq Məlikovanın bədii rəhbəri olduğu Dövlət Rəqs Ansamblının ifasında Azərbaycanın milli rəqs nümunələri olan “Cəngi”, “İncəlik”, “Nəlbəki”, “İgidlər”, “Məzəli” kimi rəqslərə tamaşa ediblər. Tanınmış pianoçu və bəstəkar Salman Qəmbərovun rəhbərlik etdiyi, dünya şöhrətli saksofon ifaçısı Rain Sultanovun da yer aldığı caz qrupu isə Azərbaycan muğamı və cazın sintezindən ibarət musiqilərlə Azərbaycan musiqisinin zəngin imkanlarını musiqi həvəskarlarının diqqətinə çatdırıb.

Tədbirin ikinci günündə müasir Azərbaycan klassik musiqisinin görkəmli nümayəndələrindən olan, əməkdar incəsənət xadimi Yalçın Adıgözəlovun dirijorluğu ilə Londonun Orion Simfonik Orkestrinin konserti olub. Konsertdə Fikrət Əmirovun “Azərbaycan kapriççosu”, Qara Qarayevin “Yeddi gözəl” və “İldırımlı yollarla” baletlərindən süitalar, Soltan Hacıbəyovun “Karvan” simfonik muğamı, maestro Niyazinin nota köçürdüyü “Qara gilə” mahnısı ilə yanaşı, ingilis musiqi sənətinin ən gözəl nümunələrindən olan Valtonun “Kraliçanın fanfarası”, “İmperiya tacı”, Vauqan Vilyamsın “Yaşıl əlcək fantaziyası” əsərləri də səsləndirilib.

Mədəniyyət günləri çərçivəsində Londonda yaşayan gənc azərbaycanlı rəssam Kəbirə Əliyevanın rəsm sərgisi də təşkil olunub.

Tədbirlərin keçirildiyi iki gün ərzində Kadoqan sarayının foyesində Azərbaycana həsr edilmiş fotosərgi də keçirilib. Sərgidə Azərbaycan təbiəti, tarixi, mədəniyyəti, adət-ənənələrini özündə əks etdirən 100-dən artıq foto nümayiş etdirilib. Foto-sərginin tarix bölümündə, həmçinin Ermənistan-Azərbaycan, Dağlıq Qarabağ münaqişəsindən bəhs edən fotolar sərgilənib, konflikt barədə əcnəbiləri məlumatlandırmaq məqsədilə məlumat tabloları qoyulub.

Mədəniyyət günlərində iştirakçılara, həmçinin Azərbaycan yeməkləri təqdim olunub, Azərbaycan milli xalça nümunələri nümayiş etdirilib.

Mədəniyyət günləri çərçivəsində Ermənistan-Azərbaycan, Dağlıq Qarabağ münaqişəsi, onun ağrılı nəticələrinə dair həqiqətlərin dünyaya çatdırılması məqsədilə Avropa Azərbaycan Cəmiyyəti tərəfindən ingilis dilində hazırlanmış “Dünyanın unutduğu insanlar: Qarabağ müharibəsindən görüntülər” (The People the World Forgot: Visions of the Nagorno-Karabakh Conflict) adlı kitabın təqdimatı da keçirilib. Foto-albom formatında hazırlanmış kitabın giriş hissəsində oxuculara Dağlıq Qarabağ münaqişəsinin tarixi və səbəbləri haqqında məlumat verilir. Redaktoru Avropa Azərbaycan Cəmiyyətinin sədri Tale Heydərov olan bu nəşrdə münaqişə barədə foto-jurnalistika baxımından ən təsirli fotolar dərc edilib.