Mədəniyyət siyasəti

Ana səhifə

Mədəniyyət siyasəti

Samuxda tarixi abidələr baxımsızlıqla üzləşib

03 dekabr 2009 05:53 (UTC +04:00)

Samux. Ayxan Hüseynov - APA. Qədim yaşayış məskənləri ilə zəngin olan Samux rayonunda SSRİ dövründə 23 tarixi abidə qeydiyyata alınıb. APA-nın qərb bürosunun xəbərinə görə, bunlardan 21-i Çoban Abdallı kəndində yerləşir.

Lakin bu tarixi abidələr baxımsızlıq ucbatından uzun illər yağış-qar sularının təsiri nəticəsində məhv olublar. Hazırda isə Samux rayonunda Mədəniyyət və Turizm Nazirliyi tərəfindən qeydə alınmış 4 tarixi abidə var. Bunların ən qədimi Kolayır kəndi ərazisində yerləşən və yaşı 1400 il olduğu güman edilən “Düldül” çinarıdır ki, bu ağac öz görkəmi ilə insanları özünə cəlb edərək insanların inanc yerinə çevrilib. Samux rayon əhalisi bu ağacı ziyarət edir, onun budaqlarına yaylıq, dəsmal bağlayıb niyyət edirlər.

Rayon ərazisində qeydə alınan digər abidələr Çoban Abdallı kəndində yerləşən VI-VII əsrlərə aid “Abdal” pir ocağı, bu kənddə yerləşən XIX əsrə aid “Abdal” körpüsü, Hacallı və Fizuli kəndlərinin XIX əsrə aid kənd qəbiristanlığıdır. Bu tarixi abidələr Mədəniyyət və Turizm Nazirliyində qeydiyyata alınmasına baxmayaraq, nazirlik tərəfindən Samux rayon Mədəniyyət və Turizm İdarəsinə bu abidələrin mühafizəsi üçün ştat ayrılmayıb. Bu barədə APA-nın Qərb bürosuna məlumat verən Samux rayon Mədəniyyət və Turizm İdarəsinin rəisi Süleyman Əliyevin sözlərinə görə, 2006-cı ildən nazirliyə tarixi abidələrin mühafizəsi üçün ştat ayrılması barədə müraciət olunub: “Buna baxmayaraq, bizə ştat ayrılmayıb və bildiriblər ki, öz daxili imkanlarınız hesabına ştat ayırın. Bu abidələr baxımsızlıqdan ildən-ilə dağılıb məhv olur. Amma daxili imkanlarımız çərçivəsində bu abidələri qorumağa çalışırıq”.

Süleyman Əliyev Samux rayon ərazisində nazirlik tərəfindən qeydə alınmamış daha üç tarixi abidənin mövcud olduğunu bildirib: “Bizim Poylu kənd qəbiristanlığı, Qarasaqqal adlanan ərazidə yerləşən “Siracəddin ağa” ziyarətgahı və Kürün sağ sahilində yerləşən “Şəhər burnu” adlandırdığımız tarixi əhəmiyyətli abidələrimiz yerlərimiz var. Bu abidələrin qeydə alınması üçün Mədəniyyət və Turizm Nazirliyinə müraciət etmişik”.

“Şəhər burnu” adlanan ərazinin qədim yaşayış yerləri olduğunu bildirən Süleyman Əliyev burada arxeoloji tədqiqatların aparılması üçün rayon icra hakimiyyəti səviyyəsində Milli Elmlər Akademiyasına müraciət etdiklərini bildirib.