Mədəniyyət siyasəti

Mədəniyyət siyasəti

Vaqif Mustafazadənin vəfatının 30-cu ildönümü ilə əlaqədar tədbir keçirilib - FOTOSESSİYA

Vaqif Mustafazadənin vəfatının 30-cu ildönümü ilə əlaqədar tədbir keçirilib - <font color=red>FOTOSESSİYA</font>

17 dekabr 2009 09:29 (UTC +04:00)

Bakı. Ülkər Qasımova – APA. Dekabrın 16-da Bakı Caz Mərkəzində Azərbaycanın dünya şöhrətli cazmeni, caz-muğamın banisi Vaqif Mustafazadənin vəfatının 30-cu ildönümü ilə əlaqədar tədbir keçirilib. APA-nın məlumatına görə, Vaqif Mustafazadə Fondunun və Vaqif Mustafazadənin Ev Muzeyinin direktoru Afaq Əliyeva cazmenin vəfatının ildönümü münasibətilə yeni kataloqun, veb-saytın hazırlandığını deyib. Bakı Musiqi Akademiyasının rektoru, xalq artisti Fərhad Bədəlbəyli isə bildirib ki, Vaqif Mustafazadə bu gün Azərbaycanda hər bir insanın ürəyindədir: “Həqiqətən də Vaqif Azərbaycanın böyük mənəvi sərvətidir, musiqi tariximizin ən parlaq səhifəsidir. Onun həyatında çox çətin illər olub. Xatırlayıram, onunla tez-tez Fəvvarələr meydanında görüşürdük. Çox gileylənirdi ki, bəzi məmurlar onun caz ifasına irad tutur. Vaqif bu yolda çox bəlalardan keçib, ancaq yolundan dönməyib, öz sənətinə həmişə sadiq qalıb”.

Azərbaycanın xalq artisti Natəvan Şeyxova da Vaqif Mustafazadə ilə bağlı xatirələrini bölüşüb. N. Şeyxova V. Mustafazadə ilə ailəvi dost olduqlarını söyləyərək mərhumu həm çox istedadlı sənətçi, həm də böyük ürəyə sahib olan insan kimi xarakterizə edib.

Gecədə Vaqif Mustafazadənin həyat və yaradıcılığından bəhs edən www.vaqifmustafazade.az saytının təqdimat mərasimi də keçirilib. Tədbirin ən maraqlı məqamlarından biri isə yeni yaradılan “Retro - Sevil” ansamblının çıxışı olub. Ansamblın bədii rəhbəri məşhur “Sevil” ansamblının solisti Rəna Talıbova, prodüseri isə Vaqif Mustafazadənin dayısı qızı Afaq Əliyevadır. Sonda müxtəlif musiqi təhsil ocaqlarında oxuyan 6 qızdan ibarət “Retro - Sevil” ansamblının ifasında retro mahnılar səslənib.