Mədəniyyət siyasəti

Ana səhifə

Mədəniyyət siyasəti

Mədən ərazilərində yerləşən tarixi abidələr haqda məlumatların təqdimat mərasimi keçirilib

22 dekabr 2009 15:24 (UTC +04:00)

Bakı. Ülkər Qasımova – APA. Azərbaycan Respublikası Dövlət Neft Şirkətinin (ARDNŞ) baş ofisində mədən ərazilərində yerləşən tarixi abidələr haqda məlumatların təqdimat mərasimi keçirilib. APA-nın məlumatına görə, mərasimdə Mədəniyyət və Turizm Nazirliyinin, tarixi abidələrin yerləşdiyi rayonların rəhbər işçiləri, müvafiq neft-qazçıxarma idarələri mütəxəssisləri, eləcə də QHT nümayəndələri iştirak ediblər.
Tədbirdə çıxış edən ARDNŞ-nin ekologiya məsələləri üzrə vitse-prezidenti Muxtar Babayev bildirib ki, şirkətin Muzey işinin təşkili şöbəsi və Ekologiya İdarəsi əməkdaşlarının iştirakı ilə Abşeron yarımadasının mədən ərazilərində yerləşən arxeoloji və tarixi abidələrin hansı dövrdə inşa olunması, harada yerləşməsi, onların faktiki vəziyyətinin öyrənilməsi və araşdırılması məqsədi ilə ekoloji monitorinq keçirilib. Onun sözlərinə görə, mərasimin keçirilməsində əsas məqsəd ictimaiyyətin diqqətini tarixi abidələrin aşkara çıxarılması və mühafizə edilməsi ilə bağlı problemlərin həllinə cəlb etmək və bu istiqamətdə geniş müzakirələr aparmaqdır. Tədbirdə çıxış edən ARDNŞ-nin Ekologiya İdarəsinin Ekoloji təbliğat və sosial məsələlər şöbəsinin rəisi, tarix elmləri namizədi Füzuli Hacıyev Abşeron yarımadasında Dövlət Neft Şirkətinin istifadəsində olan neft-qaz mədən ərazilərində yerləşən tarixi abidələr haqqında iştirakçılara ətraflı məlumat verib. F. Hacıyev məlumatların toplanmasında Azərbaycan Milli Elmlər Akademiyasının Arxeologiya və Etnoqrafiya İnstitutunun, Mədəniyyət və Turizm Nazirliyinin əməkdaşlarının rolunu vurğulayıb, aparılmış monitorinqlər nəticəsində 50-ə yaxın tarixi abidə aşkar edildiyini, məlumatlarda onların qısa təsnifatı aparılmış, xronologiyasının verildiyini bildirib.

Mədəniyyət və Turizm Nazirliyinin Mədəni irs şöbəsinin müdiri Rizvan Bayramov çıxış edərək, Azərbaycanın memarlıq, arxeoloji və monumental abidələrinin mühafizəsi və bərpası istiqamətində görülmüş işlərdən danışıb. Beynəlxalq Ekoenergetika Akademiyasının rəhbəri Fəqan Əliyev isə çıxışında bu sahədə elektron xəritənin yaradılmasının vacibliyini qeyd edib.