Mədəniyyət siyasəti

Mədəniyyət siyasəti

Azərbaycanın xalq rəssamı Kamil Nəcəfzadənin 80 illik yubiley sərgisinin açılış mərasimi keçirilib – FOTOSESSİYA

Azərbaycanın xalq rəssamı Kamil Nəcəfzadənin 80 illik yubiley sərgisinin açılış mərasimi keçirilib – <font color=red>FOTOSESSİYA </font>

12 yanvar 2010 15:08 (UTC +04:00)

Bakı. Ülkər Qasımova – APA. Dekabrın 12-də Rüstəm Mustafayev adına Azərbaycan Dövlət İncəsənət Muzeyində Azərbaycanın xalq rəssamı Kamil Nəcəfzadənin 80 illik yubiley sərgisinin açılış mərasimi keçirilib. APA-nın məlumatına görə, sərgi Mədəniyyət və Turizm Nazirliyi və Azərbaycan Rəssamlar İttifaqı ilə birgə təşkilatçılığı ilə baş tutub.
Sərginin açılışında çıxış edən mədəniyyət və turizm nazirinin müavini Ədalət Vəliyev tanınmış rəssamın həyat və yaradıcılığına nəzər salıb: “Azərbaycan kino, teatr və rəngkarlıq sənətinin istedadlı nümayəndələri sırasında görkəmli rəssam Kamil Nəcəfzadə layiqli yer tutur. O, ömrünün 60 ilə yaxın bir dövrünü rəssamlıq sənətinə həsr edib və bu gün də onun rəngkarlıq janrında əsərləri göz önündədir”.
Azərbaycan Rəssamlar İttifaqının sədri, xalq rəssamı Fərhad Xəlilov K. Nəcəfzadənin əsərləri arasında 20 yanvar faciəsinə həsr etdiyi işləri yüksək qiymətləndirib: “Səhnəqrafiya və kino filmlərin bədii tərtibatı ilə yanaşı, Kamil Nəcəfzadə rəngkarlıq və qrafika sahələrində də öz istedadını bu günə qədər nümayiş etdirir. O, 1957-ci ildən Rəssamlar İttifaqının və Kinematoqrafçılar İttifaqının üzvüdür. Onun yaratdığı əsərlər bənzərsizliyi ilə seçilir. Rəssamın əsərləri dünyanın bir çox guşələrində - Amerika, Böyük Britaniya, Yaponiya, Türkiyə, Çexoslovakiya, Almaniya, Fransa, Kanada, Monreal və başqa ölkələrin muzeylərində, şəxsi kolleksiyalarda saxlanılır. Həmin ölkələrin bir neçəsində rəssamın fərdi sərgiləri Azərbaycan təsviri sənətinin uğurlu nailiyyətləridir”.
Qafqaz Müsəlmanları İdarəsinin sədri Şeyxülislam Hacı Allahşükür Paşazadə Kamil Nəcəfzadənin yaradıcılığını çox sevdiyini və məhz onun yaradıcılığını izləmək üçün sərginin açılışına gəldiyini vurğulayıb: “Bu gün məhz Kamil Nəcəfzadə yaradıcılığını izləmək üçün özümə istirahət vermişəm. Onun yaradıcılığı çoxsaylı insanlar üçün olduğu kimi mənim üçün də çox qiymətlidir. Bu gün bur sərgidə iştirak etməyimdən məmnunluq hissi keçirirəm”.
Sərginin açılışında Azərbaycan Rəssamlıq Akademiyasının rektoru Ömər Eldarov, Azərbaycan Kinematoqrafçılar İttifaqının I katibi, xalq artisti Rasim Balayev və başqaları 80 yaşlı Kamil Nəcəfzadəyə yaratdığı əsərlər üçün minnətdarlıqlarını bildiriblər. Ömər Eldarov eləcə də rəssamın 80 yaşı münasibəti ilə ona göstərdiyi xidmətlərə görə diplom təqdim edib.