Mədəniyyət siyasəti

Ana səhifə

Mədəniyyət siyasəti

Əbülfəs Qarayev: “İstiqlaliyyət Muzeyinin yaradılması ilə bağlı müsabiqəyə təqdim olunan layihələr nə bizi, nə də xüsusi münsiflər heyətini qane etməyib”

19 yanvar 2010 14:11 (UTC +04:00)

Bakı. Ülkər Qasımova-APA. “Əfsuslar olsun ki, Azərbaycanda İstiqlaliyyət Muzeyinin yaradılması ilə bağlı elan olunan müsabiqəyə təqdim olunan layihələrin heç biri nə bizi, nə də xüsusi münsiflər heyətini qane etməyib. Təqdim olunan heç bir layihə İstiqlal Muzeyinin və monumentin konsepsiyasına layiqli deyildi. Biz İstiqlal Muzeyinin yaradılması ilə bağlı müsabiqəni iki dəfə uzatmağa məcbur olduq, ancaq bu da hələlik nəticə verməyib”. Bu sözləri APA-ya açıqlamasında mədəniyyət və turizm naziri Əbülfəs Qarayev verib.

Nazir Azərbaycanın faciəvi günlərinə həsr olunmuş əsərlərin də yaradılmasını nəzərdə tutulan İstiqlaliyyət Muzeyində öz əksinin tapacağını nəzərə çatdırıb: “Bu gün faciələrimizlə bağlı əsərlər ayrı-ayrı fondlarda saxlanılır. Fikrimcə, bir mövzuya həsr olunmuş əsərləri bir araya gətirmək düzgün deyil. Onlar müxtəlif kolleksiyalarda olmalı, daha çox auditoriyalara yol tapmalıdır. Əgər biz Azərbaycan xalçalarını dünyadan yığışdırsaq və hamısını ölkəmizə gətirsək, bəs onları sonra kim görəcək? Bizə lazımdır ki, bu xalçalar, bu əsərlər hər yerdə olsun və dünya ictimaiyyəti bunların Azərbaycana məxsus olduğunu bilsin. 20 yanvar faciəsi ilə bağlı olan əsərlər Salyan, Naxçıvan, Gəncə, Lənkəranda da saxlanılmalıdır. Çünki insanlar orada rəsm qalereyalarına və muzeylərə gedərkən başlarına gələn faciələri də duymalıdır. Tək Azərbaycanda yox, xaricdə də bunu etmək vacibdir”.

Mədəniyyət və turizm naziri açıqlamasında bu yaxınlarda alman rəssamının 20 yanvar faciəsini əks etdirən əsərinin Azərbaycan muzeyi üçün alındığını bildirib: “Bu alman rəssamı ölkəmizdə olduğu müddətdə Qarabağ tarixini öyrənib və böyük bir əsər yaradıb. Qarabağ mövzusuna həsr olunmuş əsəri artıq muzey alıb. Bu cür əsərlər müxtəlif ölkələrdə keçirilən sərgilərdə nümayiş olunmalıdır”.