Mədəniyyət siyasəti

Mədəniyyət siyasəti

Kubada Azərbaycan Mədəniyyəti günləri başa çatıb

09 mart 2010 20:55 (UTC +04:00)

Bakı-APA. Kubada Azərbaycan Mədəniyyəti günləri başa çatıb.

APA-ya Azərbaycan Respublikasının BMT yanında Daimi Nümayəndəliyindən verilən məlumata görə, sözügedən tədbir Azərbaycan – Kuba hökumətlərarası komissiyasının növbəti üçüncü iclası ilə eyni vaxtda, martın 3-6-da keçirilib. Mədəniyyət günlərində iştirak etmək üçün Kubaya əlliyə yaxın Azərbaycan incəsənət xadimləri, mətbuat və texniki heyəti əhatə edən bir qrup gedib.

Mədəniyyət günləri çərçivəsində Azərbaycan Mahnı teatrı, Dövlət Rəqs Ansamblı, uşaqlardan ibarət «Şərq çırağı» yaradıcılıq qrupu, tanınmış cazmen İsfar Rzayev Sarabskinin iştirakı ilə caz qrupu iştirak ediblər.

Azərbaycanı tərənnüm edən fotosərgi və xalqımızın milli geyimlərinin nümayişi Havananın Xose Marti adına Milli Kitabxanasında keçirilib.

Bundan başqa, Havananın tanınmış kinoteatrlarından biri olan «İnfanta»da yeni Azərbaycan filmləri nümayiş etdirilib. Bunların içində «Qırxıncı qapı», «Hökmdarın taleyi», «Məhkum edilmişlər» geniş tamaşaçı auditoriyasını toplayıb.

Azərbaycan Mədəniyyət günlərinin açılış qala konserti Havananın məşhur Mella teatrında mindən artıq tamaşaçı axını qarşısında böyük müvəffəqiyyətlə keçib. Konsertdə Azərbaycanın Mədəniyyət və Turizm naziri Əbülfəz Qarayev, Azərbaycanın Kubadakı Fövqəladə və Səlahiyyətli Səfiri Aqşin Mehtiyev, Azərbaycan-Kuba hökumətlərarası komissiyasının Azərbaycanlı nümayəndələri, Kubanın hökumət rəsmiləri, hakim Kommunist partiyasının rəhbər şəxsləri, diplomatik korpusun üzvləri, digər rəsmilər iştirak ediblər. Bundan başqa, yüzlərlə ölkəmizdə təhsil almış kubalılar da konsertə gəliblər.

Havanadan başqa Azərbaycan artistləri Kubanın Matansaz əyalətində olaraq orada geniş tamaşaçı qarşısında çıxış ediblər. Matansazın Musiqi Mərkəzində isə Azərbaycan incəsənət xadimləri kubalı gənclərə xalq rəqslərindən ibarət kiçik bir çıxış və birgə səhnələr nümayiş etdiriblər.

Kuba televiziyası və ölkə mətbuatı Azərbaycan mədəniyyət günlərini geniş işıqlandırıblar.