Mədəniyyət siyasəti

Ana səhifə

Mədəniyyət siyasəti

Azərbaycan və Mavritaniya arasında qarşılıqlı əməkdaşlığa dair ilkin sənəd imzalanıb – FOTO

Azərbaycan və Mavritaniya arasında qarşılıqlı əməkdaşlığa dair ilkin sənəd imzalanıb – <font color=red>FOTO </font>

08 aprel 2010 13:06 (UTC +04:00)

Bakı. Ülkər Qasımova-APA. Bu gün mədəniyyət və turizm naziri Əbülfəs Qarayev Azərbaycanda səfərdə olan Mavritaniya İslam Respublikasının xarici işlər və əməkdaşlıq naziri xanım Naha Mint Muknassın qəbul edib. APA-nın məlumatına görə, nazirlərin görüşündə iki ölkə arasında gələcək üçün qarşılıqlı əməkdaşlıq perspektivləri müzakirə edilib. Mədəniyyət və turizm naziri Əbülfəs Qarayev Azərbaycanın bütün sahələrdə görünən inkişafından danışıb, eləcə də qonaq nazirə Azərbaycan torpaqlarının 20 faizinin düşmən tapdağı altında olduğunu diqqətə çatdırıb: “Azərbaycanın düşmən tapdağı altda olan 20 faiz torpağında Azərbaycanın çoxsaylı mədəni, tarixi abidələri məhv edilib. Sözsüz ki, dağıdılan bu mədəni abidələr tək Azərbaycan mədəniyyətinə dəyən ziyan deyil, bu ziyan bütün islam ölkələrinə dəyir. İki islam ölkəsi olaraq bizim qarşılıqlı əlaqələrimiz yüksək səviyyədə deyil. Ancaq bu əməkdaşlığı yüksək səviyyədə həyata keçirmək üçün ikitərəfli addım atılmalıdır. Biz Azərbaycan olaraq bu əməkdaşlıqda maraqlıyıq”.

Azərbaycana ilk dəfə səfər edən Mavritaniya İslam Respublikasının xarici işlər və əməkdaşlıq naziri xanım Naha Mint Muknass isə Azərbaycanın qısa müddət ərzində sürətli inkişafını yüksək qiymətləndirdiyini diqqətə çatdırıb. Qonaq nazir Azərbaycanla bir çox sahələrdə, eləcə də mədəniyyət sahəsində qarşılıqlı əməkdaşlığın həyata keçirilməsinin marağında olduğunu deyib. Daha sonra hər iki nazirin razılığı ilə iki ölkə arasında qarşılıqlı mədəni əməkdaşlığa dair hazırlanmış ilkin sənəd imzalanıb. İmzalanan ilkin sənəddə Mavritaniya və Azərbaycan arasında qarşılıqlı mədəniyyət günlərinin, sərgilərin keçirilməsi, muzey sahəsində qarşılıqlı əməkdaşlıq münasibətlərinin qurulması, xalq yaradıcılığını əks etdirən tədbirlərin təşkili nəzərdə tutulur.

Qeyd edək ki, Mavritaniya İslam Respublikasının xarici işlər və əməkdaşlıq naziri xanım Naha Mint Muknassın Azərbaycana səfəri aprelin 9-da başa çatacaq.