Mədəniyyət siyasəti

Mədəniyyət siyasəti

Bakıda Qeyri-Maddi Mədəni İrsin Qorunması üzrə TÜRKSOY-un III beynəlxalq seminarı keçirilir

27 aprel 2010 09:28 (UTC +04:00)

Bakı. Ülkər Qasımova-APA. Bu gün Muzey Mərkəzində Bakı və Şəki şəhərlərində keçiriləcək Mədəniyyət və Turizm Nazirliyinin təşkilati dəstəyi ilə Qeyri-Maddi Mədəni İrsin Qorunması üzrə TÜRKSOY təşkilatının “Türkdilli xalqların qeyri-maddi mədəni irsinin konvensiyalaşdırılması, inventarlaşdırılması və proqramlaşdırılması” mövzusunda III beynəlxalq seminarının açılışı keçirilib. APA-nın məlumatına görə, seminarı giriş sözü ilə açan mədəniyyət və turizm naziri Əbülfəs Qarayev üç günlük seminarın əhəmiyyətindən danışıb. Nazir seminarın Azərbaycanın Sənətkarlıq Paytaxtı olan Şəkidə də keçirilməsini gözəl hadisə adlandırıb. Nazir çıxışında Azərbaycana məxsus xalçaların bir çox ölkələrdə erməni xalçaları kimi təqdim olunmasını ürək ağrısı ilə qeyd edib: “Bizim bu il üçün nəzərdə tutduğumuz əsas iş Azərbaycan xalçalarının YUNESKO-nun siyahısına təqdim edilməsidir. Bunun üçün lazımi işlərə başlamışıq. Çox təəssüfləndirici haldır ki, bizim xalçalarımız bir çox ölkələrdə bədnam düşmənlərimizin adı ilə təqdim olunur. Bu cür hallarla rastlaşanda isə bizim ürəyimizə xəncər batır. Biz isə bu halın qarşısının alınması yolunda əlimizdən gələni edəcəyik və buna hazırıq”.
Seminarda iştirak edən TÜRKSOY təşkilatının Baş katibinin müavini Fırat Purtaş Bakıya gəlməsindən məmnunluğunu dilə gətirib: “İlk toplantını 2008-ci ildə Ankarada, ikinci toplantımızı 2009-cu ildə Qazaxıstanın Almatı şəhərində həyata keçirmişik. Paytaxt şəhərinizdə açılışını keçirdiyimiz bu seminarda TÜRKSOY-a üzv olan ölkələrdən Türkiyə, Qazaxıstan, Tatarıstan, Şimali Kip Türk Cümhuriyyətindən təmsilçilərimiz iştirak edir. Seminarın Şəkidə də keçirilməsi çox önəmlidir. Bu cür tədbirlərin təşkili sahib olduğumuz mədəni mirasın gələcək nəsillərə çatdırılması, dünya miqyasında tanınması və Türk dilli ölkələrin daha yaxın olması yönündə keçirilən tədbirlər sırasındadır”.
Seminarda Türkiyə Respublikası Qazi Universitetinin professoru Öcal Oğuz, Türkiyə Respublikası Hacettepe Universitetinin professoru Nəbi Özdəmir, Türkiyə Respublikasının Mədəniyyət və Turizm Nazirliyi Araşdırma və Təhsil Baş İdarəsinin şöbə müdiri Şengül Gitməz, eləcə də digər üzv ölkələrdən nümayəndələr iştirak edir.
Seminarın ilk günü “Türk dünyasının qeyri-maddi mədəni irsinin qorunması və dəstəklənməsinin konvensiyalaşdırılması perspektivləri” mövzusunda məruzə dinlənilib. Günün ikinci yarısında isə iştirakçılar 2010-cu il üçün Azərbaycanın Sənətkarlıq Paytaxtı - Şəkiyə yola düşəcək və seminar işini aprelin 28-də Şəki şəhərində davam etdirəcək. Ertəsi gün iştirakçıların Şəki şəhərinin muzeyləri və tarixi abidələri ilə tanışlığı gözlənilir. Aprelin 30-da şəhərimizin qonaqları üçün İçərişəhər Dövlət Tarixi-Memarlıq Qoruğuna, Azərbaycan Dövlət İncəsənət Muzeyinə və Azərbaycan Xalçası və Xalq Tətbiqi Sənəti Dövlət Muzeyinə ekskursiyaları təşkil olunacaq.