Mədəniyyət siyasəti

Mədəniyyət siyasəti

Azər Dadaşovun fortepiano əsərlərinin ən yaxşı ifaçısı üzrə ötən ilin iyun ayında elan edilən müsabiqənin nəticələri məlum olub

14 may 2010 16:05 (UTC +04:00)

Bakı. Ülkər Qasımova – APA. Azərbaycan Bəstəkarlar İttifaqının 75 illiyi ilə əlaqədar olaraq, tanınmış bəstəkar, əməkdar incəsənət xadimi Azər Dadaşovun fortepiano əsərlərinin ən yaxşı ifaçısı üzrə, təşkilatın ötən ilin iyun ayında elan etdiyi müsabiqənin nəticələri məlum olub. İttifaqın mətbuat xidmətindən APA-ya verilən məlumata görə, Azərbaycanda uşaq, yeniyetmə və gənclər arasında musiqi sənətinə həvəsin artırılması, musiqi zövqünün formalaşması, müasir Azərbaycan bəstəkarlarının uşaqlar üçün yaratdıqları əsərlərin təbliği, fortepiano üzrə təhsil alan şagirdlərin repertuarının yeniləşməsi, xüsusi istedada malik uşaq və gənclərin aşkara çıxarılması məqsədilə keçirilən müsabiqədə Bakı və Sumqayıt şəhərinin uşaq və orta ixtisas musiqi məktəblərinin, musiqi kolleclərinin 8-17 yaş arası 42 yetirməsi iştirak edib.
Azərbaycan Bəstəkarlar İttifaqının sədri xalq artisti, professor Firəngiz Əlizadənin rəhbərlik etdiyi, Üzeyir Hacıbəyli adına Bakı Musiqi Akademiyasının prorektoru, professor, əməkdar incəsənət xadimi Oqtay Abasquliyev, Bülbül adına Orta İxtisas Musiqi Məktəbinin direktoru, əməkdar incəsənət xadimi Nigar Cərulla qızı, Bakı Musiqi Akademiyasının nəzdindəki orta ixtisas Musiqi Məktəbinin direktoru, professor, əməkdar incəsənət xadimi Tərlan Seyidov, əməkdar artist Murad Hüseynov, Leopold və Mstislav Rastropoviç adına 21 saylı Orta İxtisas Musiqi Məktəbinin direktoru, əməkdar müəllim Rafiq Əzizovdan ibarət münsiflər heyəti gənc pianoçuların ifasında klassik musiqi nümunələrini və Azər Dadaşovun əsərlərini dinləyiblər. Münsiflər heyətinin yekun qərarı ilə Bülbül adına Orta İxtisas Musiqi Məktəbinin şagirdi Züleyxa Usubova I, Bülbül adına Orta İxtisas Musiqi Məktəbinin şagirdi Aynur Abdullayeva və Sumqayıt Musiqi Kollecinin tələbəsi Fuad Əlizadə II, 21 və 16 saylı musiqi məktəblərinin şagirdləri Tural Xankişiyevlə Lamiyə Mustafazadə, o cümlədən məktəb-studiyanın tələbəsi Firuzə Bəylərova isə III yerə layiq görülüblər. Azərbaycan Bəstəkarlar İttifaqının sədri, xalq artisti, professor Firəngiz Əlizadə qalibləri elan edərək onları təbrik edib. F.Əlizadə onu da vurğulayıb ki, 22 saylı musiqi məktəbinin şagirdi Nuray Rzayeva münsiflər heyətinin yekdil qərarı ilə müsabiqənin fəxri diplomuna layiq görülüb. İştirakçılardan Fərəh Əliyeva ən gənc iştirakçı kimi, Aylin Verdiyeva isə Azər Dadaşovun əsərinin ən yaxşı solo ifasına görə diplomlarla təklif ediliblər. Müsabiqədə ilk 3 yeri tutan və Fəxri Diploma layiq görülən iştirakçılar bu ilin iyun ayında Müslüm Maqomayev adına Dövlət Filarmoniyasında keçiriləcək konsertdə iştirak edəcəklər.